Kosova

Arrestohet një person që transportonte migrantë

Një person është arrestuar nga Policia e Kosovës pasi është kapur duke transportuar ilegalisht gjashtë shtetas të huaj.

“Njësiti patrullues të hënën, ka ndaluar të dyshuarin mashkull Shqiptar shtetas i Shqipërisë duke transportuar ilegalisht jashtë pikës kufitare gjashtë shtetas të huaj. Me vendim të prokurorit i dyshuari pas intervistimit dërgohet në mbajtje”, thuhet në raportin 24 orësh të Policisë së Kosovës, përcjell albinfo.ch.

Ndërkohë, në raportin 24-orësh të Policisë së Kosovës, janë raportuar edhe për disa raste të tjera.

Prokuroria Themelore në Pejë, Departamenti i Krimeve të Rënda, ka kërkuar nga Gjykata Themelore në Pejë, caktimin e paraburgimit ndaj të pandehurit G.B., me dyshimin se i njëjtit kishte për të kryer veprën penale “Blerja, posedimi, shpërndarja e paautorizuar e narkotikëve, substancave psikotrope dhe analoge”.

Prokuroria ka marr aktvendim për fillimin e hetimeve në drejtim të kësaj vepre penale, ndaj të pandehurit G.B., dhe të pandehurve R.M. dhe Sh.G., me dyshimin se kishin për të kryer vepër penale “Posedimi paautorizuar i narkotikëve, substancave psikotrope dhe analoge”.

“Tek i pandehuri G.B., Policia e Kosovës gjatë bastisjes së veturës së tij ka konfiskuar 4kg e 917 gramë marihuanë dhe 1.2 gram narkotikë llojit kokainë, kurse tek dy të pandehurit tjerë janë konfiskuar 2 gram marihuanë. Po ashtu kjo prokurori ka lëshuar urdhër për kufizim të përkohshëm të veturës, ashtu që menjëherë pranë kësaj gjykate ka parashtruara kërkesën për sekuestrim e përkohshëm të veturës”, thuhet në njoftimin e Prokurorisë.

Seanca dëgjimore për caktimin e këtyre masave pritet të mbahet para gjyqtarit të procedurës paraprake, i cili do vendosë lidhur me kërkesën e prokurorisë.​