Lajme

Artistja shqiptaro-kanadeze, Ana Golja flet për rrugën e suksesit

Ajo në një intervistë rrëfen historinë, rrugëtimin e saj drejt suksesit dhe sfidat në botën e artit ndërkombëtar

Artistja e njohur shqiptaro-kanadeze Ana Golja, producente filmash dhe aktore, këngëtare, kompozitore dhe valltare, mori vëmendjen e mediave botërore në filmin “The Cuban”, përcjell albinfo.ch.

Ajo në një intervistë rrëfen historinë, rrugëtimin e saj drejt suksesit dhe sfidat në botën e artit ndërkombëtar.

‘Aktrimi për mua është një mënyrë për t’u shprehur. Është një mënyrë përmes së cilës u jap jetë karaktereve të ndryshme apo personave të cilët nuk kanë një mënyrë të veten për t’u shprehur. Është mënyra përmes së cilës unë ndikoj në të ardhmen’, thekson tutje Ana Golja për KultPlus.

Filmi i parë në të cilin ka luajtur Ana Golja ka qenë ‘1-800 Missing. Pastaj ka luajtur edhe në dy shfaqje teatrale si ‘White Christmas’ dhe ‘The Sound of Music’. Përgjatë kësaj kohe ajo poashtu ka xhiruar edhe filmat televiziv si ‘Connor Undercover’, ‘What’s Up Warthogs’, ‘Full Out’ dhe më vonë edhe ‘Degrassi’ për gjashtë sezone radhazi. Së fundi, ajo ka qenë edhe pjesë e filmit ‘The Fanatic’ së bashku me aktorin e mirënjohur John Travolta, poashtu edhe në ‘Love On Ice’, ‘A Father’s Nightmare’ dhe ‘I Do Or Die’. Ndërkaq, filmi që mori vëmendje të madhe, duke i dhënë kështu Anës edhe çmimin e aktores më të mirë në ‘Lavazza Film Festival’, ishte filmi ‘The Cuban’ ku përveç se aktore, ajo ishte edhe producente e këtij filmi.

Te filmi “The Cuban”, ajo luan përkrah fituesit të çmimit Oscar, Louis Gosset Jr., dhe si producente ka fituar “Best Narrative Feature” dhe “Best Cinematography”.

Ana Golja tash është duke punuar si producente në projektin e dytë filmik, që trajton temën mbi sëmundjet mendore dhe sportin, dhe poashtu ka treguar se është duke punuar në albumin e saj të dytë të cilin pret ta lansojë diku rreth majit apo qershorit të këtij viti. Ndërkaq, për detajet tjera rreth këtyre dy projekteve, Ana ka vendosur që të mos i shpalos akoma.


LAJME INTERESANTE NGA INTERNETI