Jeta në Austri

Austria vazhdon kontrollet kufitare me Slloveninë dhe Hungarinë

Austria do ta vazhdojë kontrollin e brendshëm kufitar me Slloveninë dhe Hungarinë edhe për gjashtë muaj, deklaroi sot ministri austriak i Punëve të Brendshme, Karl Nehammer.

Në një konferencë për shtyp të mërkurën, ministri i Brendshëm, Karl Nehammer, informoi se Austria do të vazhdojë kontrollet e kufijve të brendshëm të Austrisë me Slloveninë dhe Hungarinë nga 12 nëntori 2020 deri më 11 maj 2021, raporton heute.at.

“Arsyet për këtë janë, nga njëra anë, “presioni i vazhdueshëm i migrimit, ruajtja e sigurisë së brendshme dhe situata e tensionuar përreth pandemisë së koronavirusit”, ka thënë Nehammer, përcjell Albinfo Austria.

Për më tepër, ministri ka thënë se ka njoftuar homologët e tij nga Sllovenia dhe Hungaria për vendimin e Austrisë për të vazhduar kontrollet e kufijve të brendshëm edhe për gjashtë muajt e ardhshëm.

Austria po përballet me valën e dytë të pandemisë. Ditën e mërkurë u raportua se kishte një tjetër rekord negativ për rritjen e numrit të të infektuarve. Në Austri rezultuan pozitivë me Covid -19 1346 raste të reja. Gati një e treta e rasteve janë identifikuar në Vjenë.