Baerbock insiston në reformat themelore të OKB-së

Debati i ardhshëm i Organizatës së Kombeve të Bashkuara ka të bëjë me krizat e mëdha, si lufta në Ukrainë dhe mbrojtja e klimës.

Ministrja e Punëve të Jashtme e Gjermanisë, Annalena Baerbock, po udhëton me sugjerime dhe kërkesa konkrete, shkruan DW.

Me synimin për pjesëmarrjen e saj në Javën e OKB-së në New York, Baerbock po bën fushatë për reforma thelbësore në Kombet e Bashkuara.

Gjermania është e përkushtuar që “ta bëjë sistemin e OKB-së më të drejtë, më gjithëpërfshirës dhe më të aftë për të ndërmarrë veprime”, shpjegoi ajo. Kjo përfshin gjithashtu një reformë të Këshillit të Sigurimit të OKB-së, për të cilën Gjermania ka bërë fushatë prej vitesh së bashku me Brazilin, Indinë dhe Japoninë në të ashtuquajturin G4.

“Një Këshill i Sigurimit i OKB-së që ende përfaqëson botën e shekullit të 20-të nuk është më i përshtatshëm. Vetëm nëse Kombet e Bashkuara ‘përditësojnë’ sistemin e saj operativ për t’u përshtatur me botën e shekullit të 21-të, do të jetë vendi afatgjatë ku komuniteti global mund të zgjidhë problemet e tij së bashku”, tha ajo, përcjell albinfo.ch.

Ajo ka shpjeguar se për të kontribuar në një modernizim të tillë, Gjermania dhe Namibia po udhëheqin negociatat për Samitin e ardhshëm të OKB-së në vitin 2024.

Debati i përgjithshëm në Asamblenë e Përgjithshme të OKB-së, ku merr pjesë edhe kancelari federal Olaf Scholz, fillon të martën.

---