Lajme

BAG: Vetëm nëse numri bie në 300 raste në ditë, kemi arritur diçka

Me gjithë "optimizmin e kujdesshëm" që e mundëson kjo situatë, Mathys thotë se ende nuk ka asnjë arsye për t'u `demobilizuar`

“Ne po shkojmë në drejtim të duhur, por fatkeqësisht kemi ende probleme me ritmin”. Kjo është mënyra se si Patrick Mathys, shefi i sektorit të menaxhimit të krizave dhe bashkëpunimit ndërkombëtar në Zyrën Federale të Shëndetit Publik (BAG), ka përmbledhur situatën aktuale të koronavirusit në Zvicër.

BAG, siç është njoftuar tashmë, sot ka regjistruar 1.884 raste të reja të koronës – rreth 17 përqind më pak se në të njëjtën ditë të një jave më parë, transmeton albinfo.ch. 92 njerëz janë shtruar në spital dhe 57 njerëz të infektuar me korona kanë vdekur.

Me gjithë “optimizmin e kujdesshëm” që e mundëson kjo situatë, Mathys thotë se ende nuk ka asnjë arsye për t’u `demobilizuar`. Njësitë e kujdesit intensiv janë ende shumë të ngarkuara. Pothuajse një e treta e njerëzve të shtrirë atje janë pacientë me Covid, ka shtuar Mathys.

Duke kujtuar rrezikun e përhapjes së madhe të virusit të ri, Mathys ka thënë: “Kjo është arsyeja pse është jashtëzakonisht e rëndësishme të ulen numrat sa më shpejt që të jetë e mundur, përcjell albinfo.ch. Kjo duhet bërë në mënyrë që të ketë hapësirë rë mjaftueshme në rast se për shkak të virusit mutant, numri i rasteve papritmas rritet.

Mathys përmend një maksimum prej 300 infeksioneve të reja në ditë si një vlerë specifike e synuar. “Ky do të ishte numri drejt të cilit do të duhet të shkonim”.