Banka zvicerane paralajmëron shkurtime të vendeve të punës

Banka private zvicerane ‘Julius Baer’ thotë se do të shkurtojë rreth 130-140 vende pune, si pjesë e një programi për shkurtimin e kostos prej 100 milionë dollarësh (CHF 100 milionë), pasi rritja e fitimit u ngadalësua në 2018-ën.

Banka me bazë në Cyrih njoftoi të hënën se fitimet para tatimit ishin rritur vetëm 1% në 2018 në 893.9 milionë franga. Mjetet nën menaxhim ranë me 2% në krahasim me vitin e kaluar, në 382 miliardë franga në fund të dhjetorit, përcjell albinfo.ch.

Si rezultat, banka tha se kishte nisur një “program të reduktimit të kostove strukturore” për të ulur shpenzimet për 100 milionë franga. Gjatë vitit 2019, Julius Baer ka për qëllim të zvogëlojë numrin e punonjësve të saj me 2% nga 6,693 staf me orar të plotë, por shtoi se do të vazhdojë punësimin në fusha strategjike.

Kryeshefi ekzekutiv, Bernhard Hodler, përshkroi një mjedis sfidues “për të gjithë industrinë”, duke treguar një “rënie të mprehtë në tregjet e aksioneve globale” në gjysmën e dytë të vitit 2018 dhe një rënie në euro.

“Ne vazhdojmë të bëjmë investime strategjike të rritjes dhe kemi filluar një program strukturor të reduktimit të kostove për të absorbuar luhatjet e të ardhurave nga shifrat e mundshme të tregut në periudhën afatshkurtër dhe afatmesme”, tha ai.