Basler Zeitung ndërron pronarin

Blerës i gazetës "Basler Zeitung" është biznesmeni nga Bazeli, themeluesi i Crossair, Moritz Sutter

Afera rreth implikimit të politikanit të njohur konservativ zviceran dhe miliarderit Christoph Blocher në udhëheqjen e gazetës “Basler Zeitung” ka marrë një zgjidhje të papritur.

Të ballafaquar me rezistencën e redaksisë dhe të opinionit, dy ish pronarëve, Tito Tettamanti dhe Martin Wagner nuk u mbeti tjetër veçse të tërhiqen nga biznesi. Ata madje, në procedurë të shpejtuar, kanë shitur gjithë Shoqërinë Aksionare Basler Zeitung medien AG. Blerësi fatlum është biznesmeni nga Bazeli, themeluesi i Crossair, Moritz Sutter.

Me të blerë këtë ndërmarrje, Moritz Sutter ka anuluar mandatin kontestues të ish udhëheqjes së ndërmarrjes me ndërmarrjen Robinvest AG, e cila është pronë e Blocherit. Pronari i ri ka bërë edhe ndryshime tjera por nuk e ka ndërruar kryeredaktorin e gazetës, Markus Somm, i cili po ashtu ishte kontestuar nga redaksia, si mbështetës i Blocherit.