BE ende pa konsensus për ndalimin e plotë të gazit rus

Aktualisht nuk ka marrëveshje në Bashkimin Evropian për vendosjen e një ndalimi të plotë të importit të burimeve ruse të energjisë, si gazi dhe nafta, tha sot Përfaqësuesi i Lartë i BE-së për Politikë të Jashtme dhe Siguri, Josep Borell.

Në një intervistë për gazeten gjermane, “Die Welt”, ai ka bërë të ditur se kjo do të diskutohet sërish në samitin e ardhshëm të liderëve të BE-së në maj.

Komisioni ndoshta do t’u dërgojë propozime anëtarëve të BE-së këtë javë për paketën e gjashtë të sanksioneve kundër Rusisë, për shkak të luftës në Ukrainë.

“Ndërprerja e importeve të naftës dhe gazit apo sanksionet do të ishin të rëndësishme për të ushtruar presion mbi Putinin dhe që ai të sillet në tryezën e bisedimeve”, tha Borell.

Por, siç shtoi ai, “për momentin ne në BE nuk kemi një qëndrim të unifikuar për këtë çështje”.
“Disa anëtarë e kanë bërë të qartë se nuk do të mbështesin embargon ndaj naftës ose gazit rus. Kjo do të thotë se nuk ka ende marrëveshje në BE për këtë,” tha Borell, përcjell Albinfo.ch.

Kjo është arsyeja pse propozimi përfundimtar për sanksionet për naftën dhe gazin nuk është në tryezë, përfundoi ai.