BE-ja gjobit Google me 1,49 miliardë euro

Komisioni Europian i vendosi një tjetër gjobë gjigantit amerikan të internetit Google, pas akuzave të përsëritura për abuzim me pozitën dominuese, këtë herë në një rast me kompaninë e reklamave “AdSense”.

Ky sanksion financiar prej 1,49 miliardë eurosh është i treti i vendosur në më pak se dy vjet nga ekzekutivi europian, rregullator i konkurrencës në Europë.

Në rastin konkret, ku është i përfshirë “AdSense”, Komisioni kritikon Google se ka vendosur një sërë klauzolash kufizuese në kontratat e mëparshme me web-et e palëve të treta, duke penguar në këtë mënyrë konkurrentët e tij që të vendosin reklamat e tyre që lidhen me kontekstin në këto web faqe, shkruan atsh, përcjell albinfo.ch.

‘’Këto praktika janë të paligjshme kundrejt rregullave të Bashkimit Europian në aspektin e praktikave antikonkurrencë’’, deklaroi komisionerja për Konkurrencën, Margrethe Vestager, cituar në një deklaratë.