Tematike

Befasia nga të rinjtë e SVP-së: “Stop agjitacionit kundër shqiptarëve”!

Kemi të bëjmë këtu me përdorimin e "problemit shqiptar" për të përligjur qëndrimin e kësaj partie kundër masave të mbrojtjes nga koronavirusi

Duket se përfundimisht po jetojmë në një kohë të çudirave: Ndryshe si mund të shpjegohet fakti se komunitetit shqiptar të Zvicrës “i vjen mbrojtja” pikërisht nga SVP, partia e cila njihet prej vitesh për krijim të disponimit kundër të huajve dhe sidomos kundër shqiptarëve.

Në të vërtetë është “forumi rinor” i kësaj partie ai që ka dalë sot me një deklaratë të fortë për shtyp, në favor të komunitetit të këtushëm shqiptar, shkruan albinfo.ch.

“Ndaloni agjitacionin kundër shqiptarëve” – kërkojnë të rinjtë e SVP-së. Në deklaratën e përmendur për shtyp, JSVP kritikon mediat dhe politikanët për gjoja diskriminimin e të huajve, “veçanërisht shqiptarëve” – ​​dhe e kombinon këtë me qëndrimin e saj kundër ligjit Covid, shkruan 20minuten.ch.

Kemi të bëjmë këtu me përdorimin e “problemit shqiptar” për të përligjur qëndrimin e njohur të kësaj partie kundër ligjit Covid gjegjësisht kundër masave të mbrojtjes nga koronavirusi.

Sidoqoftë, Rinia e  SVP-së tani dëshiron të luftojë “diskriminimin kundër shqiptarëve”. Kështu ka shkruar Presidenti i JSVP David Trachsel në një deklaratë për shtyp të dërguar sot: “Pas të rinjve, tani edhe të huajt dhe shqiptarët në veçanti duhet të durojnë mbi vete një agjitacion absurd”. Dhe, ai e dënon një gjë të tillë, shprehet Trachsel.

“As Festivali Alba dhe as ndonjë dasmë në Serbi nuk janë fajtorë për të gjitha problemet tona”.

Më tutje Trachsel tërheq një paralele me referendum kundër ligjit Covid: Përgjegjëse për “diskriminimin dhe agjitacionin” është “politika, e cila edhe tani kur të gjithë ata që duan të vaksinohen janë vaksinuar nuk po lejon kthimin në normalitet” ka thënë presidenti i JSVP, transmeton albinfo.ch.

Në vend të kësaj, tani kemi një kërcënim për “edhe më shumë diskriminim dhe akoma më shumë masa”. Prandaj, “regjimi i pandërprerë i masave” duhet të ndalet me një Jo në votimin e dytë për Ligjin e Covid-it”.

“JSVP nuk është e besueshme”

Por Laura Zimmermann nga Operacioni Libero mendon se JSVP tani po luan rolin e shenjtores mbrojtëse të komunitetit shqiptar. “Ashtu sikur në rastet kur JSVP zakonisht bën nxitje kundër popullsisë emigrante, edhe shqetësimi i pretenduar i saj në lidhje me diskriminimin ndaj popullit shqiptar është thjesht i pabesueshëm. JSVP është e papërdorshme kudo ku kemi të bëjmë me politikën e migrimit”.

Sipas Operacionit Libero, ky mashtrim nuk është i ri për JSVP, transmeton albinfo.ch: “Ajo përdor në vazhdumësi argumentet e kundërshtarëve në mënyrë që t’i shtrembërojë ato dhe të nxjerrë prej tyre përfundimet e veta të pakuptimta”.

Për Zimmermann nuk ka dyshim që “JSVP qëllimisht dëshiron të provokojë dhe për këtë arsye i referohet Festivalit Alba dhe jo aktivitetit tjetër nën qiell të hapur, në Frauenfeld, i cili gjithashtu është anuluar”.