Berna, me papunësinë më të ulët në dhjetë vjetët e fundit

Shkalla e papunësisë në kantonin e Bernës ka rënë nga 2.6 në 1.9 për qind në vitin 2018. Kështu, shifrat e papunësisë janë në nivelin e tyre më të ulët në dhjetë vjetët e fundit. Kjo është bërë e qartë nga një raport mbi tregun e punës, të publikuar nga zyra ekonomike BECO, përcjell albinfo.ch.

Shkalla e papunësisë ra në mënyrë të konsiderueshme në të gjitha dhjetë rrethet administrative të kantonit të Bernës në krahasim me vitin e kaluar. Rënia më e madhe ishte në rrethin administrativ të Biel/Bienne, ku shkalla e papunësisë ra nga 4.3 për qind në 3.0 për qind.

Numri i të papunëve në Bernë ra me 2’513 në krahasim me vitin e kaluar. Arsyeja për papunësinë më të ulët është situata e mirë ekonomike. Produkti i brendshëm bruto (PBB) është rritur me 2.6 për qind në Zvicër dhe 1.6 për qind në kantonin e Bernës, sipas vlerësimeve të BAK Economics 2018.

Pjesërisht përgjegjës për zhvillimet e këndshme në tregun e punës në vitin 2018 ishin rritja ekonomike në eurozonë dhe kursi i këmbimit të favorshëm CHF / euro, tha BECO. Si rezultat, industria e eksporteve shënoi rritje. Punësimi u rrit në të dy sektorët e industrisë dhe shërbimeve.