Biden mbështet plotësisht aplikimin e Suedisë dhe Finlandës në NATO

(AP Photo/Paul Sancya

Presidenti amerikan, Joe Biden, ka thënë se Suedia dhe Finlanda e kanë “mbështetjen e plotë, totale dhe komplete” të SHBA-së në vendimin e tyre historik për të aplikuar për anëtarësim në NATO, përcjell albinfo.ch.

Të dy vendet paraqitën aplikimet e tyre këtë javë për të qenë pjesë e aleancës së mbrojtjes, një ndryshim drastik në gjeopolitikën evropiane.

Lëvizja e dy vendeve nordike është kundërshtuar nga aleati i NATO-s, Turqia.

Rusia e sheh NATO-n si një kërcënim dhe ka paralajmëruar për “pasojat” e zgjerimit.

Për t’u bashkuar me aleancën, të dy kombet kanë nevojë për mbështetjen e të 30 vendeve anëtare të NATO-s.

Duke folur së bashku me kryeministren suedeze, Magdalena Andersson dhe me presidentin finlandez, Sauli Niinisto, në Shtëpinë e Bardhë të enjten, Biden i quajti aplikimet e Suedisë dhe Finlandës për t’u bashkuar me NATO-n “një moment vendimtar në sigurinë evropiane”.