Një i vdekur e dy të lënduar nga rënia e një veture në humnerë

Vetura ka humbur kontrollin dhe ka rënë në humner

Një person ka humbur jetën dhe dy të tjerë janë lënduar pas një aksidenti që ka ndodhur të dielën në bjeshkët e Istogut.

Policia bën me dije se tre të rinjtë kanë qenë duke shkuar në bjeshkët e Istogut dhe në hyrje të vendit të quajtur Polanë, për shkak të kushteve të dobëta atmosferike, me automjetin e tyre që ishin duke qarkulluar kanë humbur kontrollin dhe janë rrokullisur për më shumë se 300 metra në një humnerë, përcjell albinfo.ch.

Policia e Kosovës, përkatësisht Njësite nga Stacioni Policor Istog, posa është pranuar lajmi kanë dalë ne vendin e ngjarjes së bashku me Njësitin e Trafikut Rajonal, njësitet e tjera relevante, zjarrfikësit dhe ndihma e parë, me ç’rast kanë bërë përpjekje për t’i tërhequr viktimat e aksidentuara në humnerë.

Në vendngjarje ka dalë prokurori i shtetit, i cili ka bërë shikimin e vendit të ngjarjes.

Dy të lënduarit: E.M., 24-vjeçar, vozitësi i mjetit dhe F.S. 21-vjeçar, pasagjer, janë dërguar në spitalin rajonal në Pejë për trajtim mjekësor, ndërsa trupi i pajetë i të miturit, vdekjen e të cilit e ka konstatuar ekipi mjekësor, është tërhequr nga vendi i ngjarjes për t’u dërguar në morgun e Spitalit rajonal në Pejë.

---