Bota e logjistikës ajrore: Prapa kuintave të kompanisë Cargologic në Cyrih

Në një ditë të zakonshme pune, në një nga nyjet më të rëndësishme të transportit ajror në Zvicër,  aeroportin e Cyrihut ,  patëm rastin të hyjmë në një botë që rrallë shihet nga afër: botën e logjistikës ajrore, ku çdo sekondë, çdo kilogram dhe çdo dokument ka rëndësi jetike.

swissalbs, në serinë e vizitave nëpër kompani, ka organizuar një ngjarje të ejten që mblodhi profesionistë dhe ndërrmarës shqiptaro-zviceranë në ambientet e kompanisë Cargologic, ku na priti Berat Morina, zëvendëspresident i Departamentit të Shitjes dhe Marketingut, i cili na hapi dyert drejt prapaskenave të një prej operacioneve më të sofistikuara në Zvicër për transportin e mallrave në të gjithë globin.

Me një mikpritje të ngrohtë dhe një prezantim plot pasion për punën që bën, Morina na shoqëroi nëpër hapësirat teknike ku mallrat trajtohen me saktësi kirurgjikale. Nga ngarkimi i kontenierëve ajrorë te kontrolli i dokumentacionit dhe koordinimi me rrjetin ndërkombëtar të klientëve, çdo proces në Cargologic reflekton profesionalizëm dhe besueshmëri.

“Çdo ditë këtu janë në lëvizje mallra që nisen drejt vendeve të ndryhsme të botës,  gjithçka me një orar të caktuar dhe me standarde të larta sigurie,” na shpjegon Morina, duke treguar zonat ku ruhen mallrat e ndjeshme, nga medikamentet deri te pajisjet elektronike.

Pas vizitës në të gjitha kthinat e kompanisë, të ftuarit u mblodhën për një drekë të përbashkët, ku diskutimet u zhvilluan në një atmosferë të relaksuar dhe miqësore. Dreka shërbeu si një mundësi e shkëlqyer për rrjetëzim, ku profesionistë nga sektorë të ndryshëm ndanë përvoja dhe ide për projekte të mundshme bashkëpunimi.

Cargologic, si ofruesi kryesor në Zvicër për shërbimet e përpunimit të ngarkesave ajrore, është aktive prej mbi 70 vitesh në shërbim të linjave ajrore dhe kompanive të transportit në disa aeroporte. Me synimin për të qenë më të shpejtë, më të qëndrueshëm dhe më fitimprurës sesa konkurrentët, kompania është rritur si një aktor kyç në këtë sektor. Që nga viti 2002, Cargologic është pjesë e Rhenus Group, një rrjet logjistik me praninë në 1.320 lokacione në mbarë botën dhe mbi 40.000 punonjës. Në Cyrih në këtë kompani punojnë 350 puntorë me rrënjë shqiptare.

Kjo vizitë na ofroi një pamje të qartë përtej fasadës së terminaleve ajrore: një botë që funksionon me përpikmëri, e udhëhequr nga ekspertizë, përkushtim dhe nga profesionistë si Berat Morina, të cilët jo vetëm që mbajnë gjallë mekanizmat e logjistikës globale, por edhe përfaqësojnë me dinjitet vlerat shqiptare në Zvicër.

swissalbs është një organizatë jofitimprurëse me seli në Cyrih. Si një komunitet interesash, swissalbs promovon frymën sipërmarrëse të zviceranëve me origjinë shqiptare, ofron një platformë për shkëmbimin e përvojave dhe nderon arritje të jashtëzakonshme në shoqëri, biznes, kulturë, arsim dhe politikë.