Brendon Ahmeti nga Austria përfshihet në listën e Forbes me start-upin Synaps

CEO dhe bashkëthemelues i Synaps në Vjenë, ai synon të revolucionarizojë dizajnin arkitekturor përmes inteligjencës artificiale

Revista prestigjioze Forbes ka përfshirë shqiptarin Brendon Ahmeti, CEO dhe bashkëthemelues i start-upit austriak Synaps, në listën e saj të profileve të suksesshme, transmeton albinfo.at.

Brendon Ahmeti është CEO dhe bashkëthemelues i start-upit PropTech Synaps, me seli në Vjenë, të cilin e themeloi së bashku me Kevin Cobaj (CTO) dhe Agron Bajraktari (COO). Synaps synon të bëhet një lloj “Canva për dizajn arkitekturor”, duke sjellë një qasje të re në fushën e projektimit përmes teknologjisë moderne.

Platforma është konceptuar në mënyrë që çdo përdorues të mund të përshkruajë një hapësirë, ndërsa sistemi, përmes inteligjencës artificiale, të gjenerojë dizajne të sakta, të realizueshme dhe profesionale për përdorim praktik.

Sipas Forbes, Synaps ka arritur një sukses të rëndësishëm që para lansimit zyrtar, duke siguruar 1.4 milionë euro financim, çka dëshmon interesin e madh të investitorëve ndaj këtij projekti inovativ.

Kompania ka zgjuar interes të jashtëzakonshëm edhe në treg, pasi sipas deklarimeve të saj, rreth 8 mijë kompani tashmë janë në listën e pritjes për të përdorur platformën Synaps, ndërsa bashkëpunimet e saj shtrihen me mijëra kompani nga mbarë bota.

Në një mesazh të tij, Brendon Ahmeti ka theksuar se rrugëtimi i tij profesional ka qenë gjithmonë i orientuar drejt krijimit të ndikimit real.

“Nga projektimi dhe investimi në projekte të pasurive të paluajtshme në tre kontinente, deri te ndërtimi i një kompanie që po e ripërcakton arkitekturën përmes inteligjencës artificiale, motivimi im ka qenë gjithmonë i njëjtë: të krijoj ndikim të vërtetë,” shprehet Ahmeti.

Përfshirja e Brendon Ahmetit në Forbes konsiderohet një tjetër dëshmi e potencialit të shqiptarëve në diasporë, veçanërisht në fushat e teknologjisë, inovacionit dhe inteligjencës artificiale. /Albinfo.at

Brendon Ahmeti – Forbes

---