Cana fillon zejen e trajnerit

Cana, pas një karrierë të pasur si futbollist, duke luajtur në skuadra të mëdha si Marseille, PSG, Galatasaray, Lazio e Nantes, tashmë mendon të bëhet trajner

Ish-kapiteni legjendar i Shqipërisë, i cili mban rekordin për ndeshjet me kuqezinjtë, Lorik Cana ka filluar zejen e trajnerit. Cana ka marrë diplomën e “UEFA B” pasi kreu me sukses kursin e organizuar nga Sektori i Edukimit në Federatën Shqiptare të Futbollit, shkruan albinfo.ch.

Kështu Cana pas një karrierë të pasur si futbollist, duke luajtur në skuadra të mëdha si Marseille, PSG, Galatasaray, Lazio e Nantes, tashmë mendon të bëhet trajner.

Diplomat u shpërndanë në një ceremoni të organizuar në Qendrën Stërvitore të Ekipeve Kombëtare në Kamëz. Në këtë kurs, i 22-ti, morën pjesë trajnerët e grupmoshave dhe ata të futbollit amator.

Ndërkohë, aktualisht është duke u zhvilluar kursi “UEFA PRO”, që vazhdon gjithë vitin. Gjithashtu FSHF-ja bën të ditur se do të organizohet edhe kursi “UEFA A” për trajnerë portierësh dhe për drejtor sportiv. Ky kurs do të zhvillohet në javën e parë të çdo muaji për pesë muajt e ardhshëm.