Caritasi i Zvicrës përkrah 13 fermerë të Kamenicës

Foto: Caritas Switzerland in Kosovo/Fb

Caritasi zviceran në Kosovë, në bashkëpunim me Komunën e Kamenicës ka përkrahur 13 fermerë të kësaj komune, përcjell albinfo.ch.

Fermerët përfitues janë përkrahur me paketa granti për prodhimin e mjaltit dhe pajisje për bletari.

“Janë shpërndarë materialet thelbësore si koshere bletësh LR, centrifugë elektrike, kulluese mjalti, depozitë për grumbullimin e mjaltit, vaska për heqjen e kapakëve të mjaltit, fletë dylli dhe mjete të tjera, duke u mundësuar bletarëve prodhimin e mjaltit në përputhje me standardet e kërkuara për prodhimtarinë e mjaltit. Janë dorëzuar paketa granti të kompletuara dhe të përbëra nga të gjitha materialet e nevojshme për prodhim dhe ekstraktimin e mjaltit, duke lehtësuar punën e bletarëve që të fokusohen kryesisht në prodhimin cilësor”, thuhet në njoftimin e tyre në Facebook.

Këto pako të granteve janë mbuluar 50% nga Caritasi zviceran, 35% nga Komuna e Kamenicës dhe 15% nga bletarët.