CFO-të zviceranë presin rënie ekonomike pas njoftimit të tarifave amerikane

(KEYSTONE/Urs Flueeler)

Shumica e zyrtarëve kryesorë financiarë (CFO) të kompanive në Zvicër presin një rënie të afërt të ekonomisë, sipas sondazhit gjysmë-vjetor të Deloitte, të raportuar nga gazeta “Cash”. Ndërsa në mars ata mbanin ende një qëndrim relativisht pozitiv, njoftimi për vendosjen e tarifave masive nga SHBA ka ndryshuar ndjeshëm perceptimin e tyre.

Sipas rezultateve, 58 përqind e CFO-ve tani presin një zhvillim negativ ose shumë negativ të ekonomisë zvicerane, ndërkohë që vetëm 15 përqind mbeten optimistë për një përmirësim.

Pessimizmi është edhe më i theksuar kur bëhet fjalë për Gjermaninë – 81 përqind e CFO-ve parashikojnë një zhvillim negativ ekonomik për ekonominë më të madhe të Evropës. Edhe për dy fuqitë globale, SHBA-në dhe Kinën, perspektivat nuk janë shumë më të mira: 64 përqind e CFO-ve shohin zhvillim negativ në Kinë dhe 89 përqind në SHBA, transmeton albinfo.ch.

Situata financiare brenda kompanive gjithashtu po shihet me sy gjithnjë e më skeptik. Nga marsi në prill, optimizmi ra ndjeshëm: ndërsa 61 përqind e CFO-ve kishin një qasje pozitive në mars dhe vetëm 18 përqind ishin pesimistë, në prill pesimizmi u rrit në 43 përqind, ndërsa optimistët u reduktuan në vetëm 23 përqind,shkruan 20minuten.

Ky ndryshim i ndjeshëm reflektohet edhe në pritshmëritë për rritjen e të ardhurave, marzhet e fitimit dhe zhvillimin e stafit. Sipas Deloitte, kompanitë në Zvicër janë aktualisht më të kujdesshme në lidhje me investimet dhe punësimet sesa në çdo kohë që nga viti 2020,

Edhe pse një pjesë e tarifave është shtyrë përkohësisht, kjo nuk ka mjaftuar për të përmirësuar pritshmëritë – sipas sondazhit, kohët mbeten të karakterizuara nga një pasiguri e konsiderueshme.

Në këtë studim morën pjesë 120 CFO nga sektorët më të rëndësishëm ekonomikë të Zvicrës, ndërkohë që një sondazh i dytë, më i shkurtër, përfshiu edhe 65 CFO të tjerë, transmeton albinfo.ch.