Coronavirusi: ‘’E gjithë bota duhet të veprojë’’ paralajmëron OBSH

E gjithë bota duhet të jetë në gatishmëri për të luftuar coronavirusin, ka thënë sot kreu i Programit të Emergjencave Shëndetësore të Organizatës Botërore të Shëndetit, Dr.Mike Ryan.

Dr. Ryan vlerësoi reagimin e Kinës ndaj shpërthimit të virusit vdekjeprurës, duke thënë:

“Sfida është e madhe, por përgjigja ka qenë masive.”

OBSH do të mblidhet të enjten për të diskutuar nëse virusi përbën një emergjencë globale shëndetësore.

Qyteti kinez Wuhan është epiqendra e shpërthimit.

Por virusi është përhapur në të gjithë Kinën dhe të paktën 16 vende në botë, përfshirë Tajlandën, Francën, SHBA dhe Australinë.

Më shumë se 130 njerëz kanë vdekur në Kinë dhe afër 6.000 janë infektuar.

Nuk ka kurë specifike apo vaksinë deri tani kundër këtij virusi. Megjithatë, një numër i njerëzve janë rikuperuar pas trajtimit, përcjell Albinfo.ch