Shpejtësia e përhapjes së COVID në Kinë, shqetësuese

Vala e COVID-19 po përhapet me shpejtësi në Kinë pas vendimit të fundit të autoriteteve për të braktisur strategjinë “zero COVID”, paralajmëroi një epidemiolog, këshilltar i qeverisë.

Autoritetet shëndetësore kineze njoftuan të mërkurën një lehtësim të përgjithshëm të kufizimeve sanitare pas një zemërimi në gjithë Kinën për gati tre vjet kufizime, me shpresën për të ristimuluar një ekonomi të mbytur nga kufizimet.

Autoritetet kanë hequr testimin sistematik PCR në shkallë të gjerë, kanë lejuar izolimin në shtëpi për format më të buta dhe asimptomatike të sëmundjes dhe përdorimin më të kufizuar për ndalimin e lëvizjes.

Kina është e papërgatitur për t’u përballur me një valë infeksionesh, me miliona të moshuar të pavaksinuar plotësisht dhe spitalet të paafta për të trajtuar një numër të madh pacientësh.

---