Dënohet çifti serb për sulmin ndaj taksistit shqiptar

Milosi është dënuar me 6 vjet e gjysmë burg dhe partnerja e tij, Tamara me 5 vjet e gjysmë

Milos N. 28 vjeç dhe partnerja e tij Tamara K. (27) ishin nisur me taksi nga Gmunden-i në drejtim të Linz-it. Por, nën kërcënimin e tyre, shqiptari që ishte shoferi i taksisë ishte detyruar të ndërronte drejtimin dhe të vazhdonte vozitjen deri Vjenë.

Në momentin kur ai e ndalon makinën, Milosi ia drejton atij revolen në kokë. Dhe nuk mbetet me kaq; ia plaçkit paratë dhe telefonin celular si dhe e kërcënon se do ta vrasë vetëm për faktin se është shqiptar.

Trupi gjykues ka marrë parasysh peshën e veprës penale dhe i ka shpallur fajtorë Milosin e Tamarën për sulmim të taksistit gjatë punës. Atyre u ka shqiptuar dënime të rënda: Milosi është dënuar me 6 vjet e gjysmë burg dhe Tamara me 5 vjet e gjysmë.

Mbrojtja e çiftit serb ka paralajmëruar ankesë kundër vendimit. Gjykimi ende nuk është i plotfuqishëm.

---