Maqedonia

Dimitrov: Do të pranojmë se nuk jemi në rrugën e duhur nëse humbim referendumin

Në lidhje me qëndrimin e opozitës, ai tha se çështja për momentin është më e rëndësishme sesa karriera dhe lojërat politike.

Ministri i Punëve të Jashtme të Maqedonisë, Nikolla Dimitrov në intervistë për Al Xhezaira tha se është i bindur se referendumi do të kalojë me sukses dhe se qytetarët do ta ratifikojnë Marrëveshjen me Greqinë, transmeton Portalb.mk.

“Nëse ka vetëm një votë më shumë kundër, atëherë ne absolutisht jemi të përgatitur të heqim dorë dhe të tregojmë se kjo nuk është rruga e vërtetë. Para dilemave të mëdha historike qytetarët ditën ta zgjedhin rrugën e duhur. Para nesh qëndron zgjedhja mes të kaluarës dhe të ardhmes. E kaluara është mjaft e rëndësishme për identitetin tonë, por nuk mund ta ndryshojmë, mundet që përfundimisht qytetarëve t’u ofrojmë zgjidhje se çfarë shteti do të jetë Maqedonia në të ardhshmen. Nuk kishte obligim më të madh patriotik që ta krijojmë këtë mundësi dhe t’u mundësojmë qytetarëve të zgjedhin. Unë jam i sigurt se do ta zgjedhin të ardhmen”, tha Dimitrov.

Në lidhje me qëndrimin e opozitës, ai tha se çështja për momentin është më e rëndësishme sesa karriera dhe lojërat politike.

“Ky është proces i rritjes. Nuk guxojmë të kemi frikë nga vullneti i qytetarëve, vullneti i popullit. Kjo çështje është shumë më e madhe nga e gjitha elita politika e Maqedonisë. Nuk guxojmë të mendojmë për veten, për karrierën personale. Nuk jemi të përkryer, bëjmë edhe gabime. Ka shumë fusha për betejë politike partiake, por loja strategjike e kombit tonë nuk guxon të jetë lëndë e grindjeve politike”, tha Dimitrov.

Në pyetjen e gazetarin se a ka qeveria plan B nëse nuk do ketë sukses referendumi, Dimitrov tha se janë të përkushtuar në planin A.