Durim Berisha medalja e artë e “Schaffhausen Open 2014”

Ndonëse i harruar nga institucionet e Kosovës, Durim Berisha ka mahnitur publikun zviceran në Taekwondo, duke rrëmbyer medaljen e artë në peshën 80 kg

Garuesi më i suksesshëm i Taekwondo-së në Kosovë, Durim Berisha ka mahnitur publikun zviceran në garën “Schaffhausen Open 2014” që u mbajt në Zvicër, duke rrëmbyer medaljen e artë në kategorinë 80 kilogram. Berisha është anëtari i Reprezentacionit të Kosovës në Taekwondo.

Ndonëse i harruar nga institucionet e Kosovës, Berisha për të disten herë ka shkëlqyer nga garat ndërkombëtare të Taekwondos.

Sipas një njoftimi që lëshoi Zyra për media e Federatës së Taekwondos në Kosovë, kësaj herë Berisha e përfaqësoi Kosovën me vetëfinancim, pasi që institucionet e Kosovës nuk po e financojnë këtë sport.

Sipas FTK-së, kjo është hera e katërt brenda pesë muajve, që Berisha e justifikon me medalje pjesëmarrjen e tij në evenimentet ndërkombëtare. Kësaj here në “Schaffhausen Open 2014” të Zvicrës, në kategorinë 80 Kg, Durim Berisha, sipas FTK-së, e fitoi medaljen e artë.

“Pas kampit 3 javor stërvitor i cili u organizua nga Federata e Taekwondo-së të Kosovës në Prishtinë ai u paraqit në Zvicër. Në finale mposhti kampionin aktual të Gjermanisë Ewald Glessmann në një finale dramatike e cila përfundoj me rezultat 27:23”, thuhet në njoftim.

Sipas FTK-së, kjo është ndër sukseset më të mëdha për Federatën e Taekwondo-së të Kosovës, pasi po “dëshmohet se puna e stafit teknik të kësaj Federate po sjellë fryte të vazhdueshme, ndonëse kushtet në të cilat po punohet nuk plotësojnë as kushtet minimale për të shpresuar në rezultate të tilla”.

Janë 4 medalje ndërkombëtare në 4 muajt e fundit, thuhet në deklaratë.

LAJME INTERESANTE NGA INTERNETI