“Dy Emra / Two Names”, filmi nga Toronto që sfidon heshtjen mbi lirinë e gruas shqiptare

Produksioni i “Action Production”, i financuar nga Qendra Kombëtare e Kinematografisë, trajton identitetin, autonominë dhe përplasjen mes traditës e jetës në emigrim.

Nga rrugët e Torontos vjen filmi i shkurtër “Dy Emra / Two Names”, një rrëfim i fuqishëm që shkon përtej historisë së emigrimit dhe prek plagë të thella shoqërore, transmeton albinfo.ch.

Në qendër të filmit është historia e një gruaje shqiptare në Kanada, e cila përballet me presionin e bashkëshortit për të abortuar. Përmes kësaj dileme, filmi trajton luftën e heshtur të një gruaje për të mbrojtur fëmijën dhe veten, duke vënë në pah konfliktin mes traditës, mbijetesës dhe lirisë personale.

“Dy Emra” guxon të prekë tema të ndjeshme si autonomia e gruas dhe identiteti interseks, duke sfiduar normat patriarkale dhe duke hapur debat mbi kufijtë e sakrificës dhe të drejtën për vendimmarrje.

Filmi është produksion i Action Production, i financuar nga Qendra Kombëtare e Kinematografisë, duke krijuar një bashkëpunim mes Shqipërisë, Kosovës dhe Kanadasë.

Projekti realizohet nga një ekip i njohur artistësh:

Regjia dhe skenari nga Florenc Papas, producente Gerta Qurku, drejtor fotografie Ilias Adamis, ndërsa në rolet kryesore shfaqen Rina Krasniqi dhe Afrim Muçaj.

Pavarësisht se ngjarja zhvillohet në emigrim, mesazhi i filmit është universal, duke shërbyer si thirrje për reflektim dhe dialog mbi të drejtat gjinore dhe integritetin njerëzor./Albinfo.ch

---