Dy yjet me prejardhje shqiptare, në mision për t`ua “ëmbëlsuar” politikën të rinjve

Gülsha Adilji dhe Bendrit Bajra, dy të rinj të njohur për publikun e ri mendohej se do ta bënin më të afërt temën, ndryshe jo shumë të popullarizuar, edhe te fansat e tyre

Në emisionin më të shikuar zviceran të debatit, “Arena”, që u shfaq mbrëmjen e të premtes në srf, krahas presidentes së Federatës, Doris Leuthard ishin të pranishëm edhe dy yje të njohura të mediave sociale të Zvicrës, Gülsha Adilji dhe Bendrit Bajra, të dy me prejardhje shqiptare.

Temë e emisionit ishte financimi ose jo i fondit të rrugëve (NAF), temë kjo për të cilën do të votojnë zviceranët më 12 shkurt, shkruan 20minuten.ch, transmeton albinfo.ch. Dy të rinjtë e njohur për publikun e gjerë, kryesisht për të rinjtë, mendohej se do ta bënin më të afërt temën, ndryshe jo shumë të popullarizuar, edhe te fansat e tyre.

Por, bilanci pas 60 minutash debat mbetet mjaft modest. Gülsha pas përfundimit të emisionit, ka thënë, thjesht: “vështirë”. Dhe me këtë ka menduar se e vështirë ka qenë jo vetëm tema për fondin e rrugëve por thjesht, e vështirë është edhe të ofrosh për votuesit e rinj argumente për ose kundër NAF, përcjell albinfo.ch. Ajo e përmbledh të gjithën në një fjali: “pasiguri e plotë rreth asaj se çfarë do të votojmë”.

Mbështetur në reaksionet nga mediat sociale, edhe Bendriti shprehet skeptik. “Njerëzit e mi në fakt nuk e kuptojnë për çka bëhet fjalë, siç e kam vënë re unë. Ndoshta duhen informuar më tepër, që do të thotë, ata duhet të informohen vetë, në radhë të parë”.

Moderatori i emisionit, Jonas  Projer thotë për 20minuten se të rinjtë përfundimisht duhen nxitur të interesohen edhe për tema “të rënda”, pra edhe për politikë dhe jo vetëm për `jungelcamp` e të ngjashme”.

Nisur nga kjo, duket e diskutueshme nëse angazhimi i dy secondove të famshëm i ka përmbushur pritjet e tij në plotëni, transmeton albinfo.ch. Por ideja për të zbutur emisionin politik me praninë e yjeve të rinj ka qenë gjithsesi ide e mirë.