Shqipëria

Edhe në Shqipëri ndalohen telefonat në shkolla

Në vitin e ri shkollor 2018-2019, që nis më 17 shtator në Shqipëri, nxënësit nuk do të lejohen të mbajnë telefona gjatë orës së mësimit.

Urdhri i firmosur nga ministrja e Arsimit të Shqipërisë, Lindita Nikolla ndalon rreptësishtë përdorimin e telefonave gjatë procesit mësimor si nga nxënësit, ashtu dhe nga mësuesit. Ditë më parë edhe Franca mori urdhër që të ndalohen telefonat në shkolla.

Ky urdhër hyn në fuqi menjëherë dhe njësitë arsimore vendore dhe drejtoritë e shkollave janë përgjegjës për zbatimin e tij, për marrjen e masave sipas akteve normative në fuqi në rast të shkeljes së tij, shkruan “ATSH”.

Për zbatimin e këtij urdhri ngarkohen sekretari i Përgjithshëm i MASR, Drejtoria e Përgjithshme e Politikave dhe Zhvillimit të Arsimit, Sportit dhe Rinisë, njësitë arsimore vendore dhe drejtoritë e shkollave, përcjell albinfo.ch.

Debatet në familje, për harxhimin e kohës së tepërt në rrjete sociale, rënia në mësime të nxënësve për shkak të shpërqendrimit përmes smartfonit janë kthyer në një fenomen shqetësues.