Edhe një i vdekur nga pickimi i rriqrave

Infektologu Sali Ahmeti thotë se janë edhe dy pacientë të tjerë në këtë Klinikë nga zona e Malishevës dhe Rahovecit, ku gjendja e tyre është shumë e rëndë

Edhe një person tjetër nga rajoni i Malishevës ka vdekur të premten në Klinikën Infektive në Qendrën Klinike Universitare të Kosovës (QKUK) si pasojë e pickimit të rriqrave. Personi i vdekur është një djalë 31 vjeçar, i cili u infektua me virusin Krime Kongo, që bartet nga rriqrat.

Infektologu Sali Ahmeti i ka thënë gaztës “Zëri”se pacienti i cili ishte nga Komuna e Malishevës ka qenë i shtrirë në këtë klinikë që nga 17 qershori, mirëpo gjendja e tij ka qenë shumë e rëndë. Dhe kështu nga kjo sëmundje, numri i të vdekurve arrin në katër.

“Gjendja e tij ka qenë shumë, shumë, e rëndë edhe kur ka ardhur në Klinikë. Sepse ky pacient i ka pasur edhe disa probleme shëndetësore që nga fëmijëria, por sidoqoftë sëmundja ka qenë ekstrem e rëndë edhe ne kemi bërë përpjekjet maksimale, por fatkeqësisht personi ka përfunduar me fatalitet”, ka deklaruar Ahmeti.

Sipas tij, janë edhe dy pacientë të tjerë në këtë Klinikë nga zona e Malishevës dhe Rahovecit, ku gjendja e tyre është shumë e rëndë.

“Aktualisht në Klinikën Infektive janë të shtrirë 11 pacientë që janë të prekur nga pickimi i rriqrave dhe janë në trajtim e sipër. Një është pranuar sot, të tjerët janë prej para dy – tre ditësh. Ndërkaq dy pacientë janë në gjendje shumë të rëndë dhe jemi duke bërë përpjekjet tona maksimale për t’i rehabilitur”, ka thënë Ahmeti.

Këta dy pacientë, sipas tij, janë në gjendje shumë të rëndë, njëri është nga rrethi i Malishevës dhe tjetri nga rrethi i Rahovecit.