Edi Rama pritet me protesta në Shkodër

Kryeministri i Shqipërisë, Edi Rama, është pritur me protesta në hyrje të Shkodër gjatë vizitës së tij për një takim me socialistët, në kuadër të 35-vjetorit të Partisë Socialiste.

Një grup protestuesish nga shoqëria civile janë mbledhur pranë zonës së Kalasë së Rozafës, ku ishte parashikuar të zhvillohej takimi i kryeministrit me strukturat e PS-së në Shkodër. Protestuesit kanë mbajtur pankarta të ngjashme me ato të tubimit të mëparshëm në Tiranë.

Sipas raportimeve të A2CNN, protesta është zhvilluar në mënyrë paqësore dhe nën monitorimin e forcave të policisë.
Kjo është dita e tretë e protestave në qytet. Fillimisht ato u organizuan në qendër të Shkodrës dhe pranë bashkisë, ndërsa më pas u zhvendosën në zonën pranë Kalasë së Rozafës.

Ndërkohë, avokatja Sabina Meta kishte bërë thirrje më herët për pjesëmarrje në një tubim paqësor, duke kërkuar maturi dhe shmangie të provokimeve. Sipas saj, protesta nuk synonte bllokimin e rrugëve apo qarkullimit dhe do të zhvillohej si një aktivitet jo politik në zonën përballë ish-karburantit pranë kalasë.