Ekipi DJK Schondra lufton ta ndalë refugjatin kosovar

Arsim Shabani po dëshmon talentin e tij prej futbollisti te klubi lokal gjerman DJK Schondra.

Mungesa e dokumentacioneve dhe refuzimi i kërkesës së tij për azil mund ta kthejë futbollistin shqiptar sërish në Kosovë.

Për ta ndalur Arsimin në skuadër, klubi është duke bërë përpjekje maksimale.

Arsim Shabani mund të deportohet në Kosovë. Por, ekipi dhe banorët e qytezës së vogël Schondra po luftojnë për ta ndalur refugjatin kosovar, shkruan javë më parë gazeta “mainpost.de”, njofton albinfo.ch.

Arsim Shabani flet gjermanisht dhe ka gjetur një vend pune. Ai po ashtu paguan qira 200 euro për një dhomë, me kuzhinë dhe banjë në një kamp refugjatësh, të cilën e ndan me një azilant tjetër.
Banorët e Schondrerit nuk mund ta kuptojnë pse ai duhet të dëbohet. “Nëse dikush është i integruar mirë, atëherë ai është Arsimi”, thotë Horst Conze, vullnetar që kujdeset për azilkërkuesit.

Klubi futbollistik së bashku me disa iniciatorë kanë bërë peticion për mosdëbimin e Arsimit. Këtë peticion e ka mbështetur edhe kryetari i  Schondras, Bornold Martin, dhe priftërinjtë e kishës Shën Ana.  Por pavarësisht kësaj, suksesi nuk është i garantuar, ngase Arsimi vjen nga Kosova, ku konsiderohet si një vend i sigurt, kishte shkruar “mainpost.de”, percjell albinfo.ch.

Por gazeta gjermane shkruan edhe një herë për fatin e Arsim Shabanit.  Siç pohon gazeta dje, Arsim Shabani është pjesë e rëndësishme për klubin.  Ai është një punëtor i madh dhe angazhohet shumë për ekipin, njofton albinfo.ch.

“Lufto për Arsimin Shabanin”, është mbishkrimi i vendosur në fanellat e klubit së bashku me një gisht të madh të ngritur përpjetë. Por, asgjë nuk është e sigurt, sepse shanset për t’u pranuar kërkesa e azilit për kosovarët janë minimale. Megjithatë, klubi nuk do të dorëzohet deri në fund. Ata kanë vendosur të bëjnë apel edhe nëpërmjet faqeve të ndryshme në internet.

Në kërkesën e Arsimit thuhet se ai ishte ankuar se disa njerëz me mjekra e kishin kërcënuar në Kosovë dhe se ai nuk mund të kthehej atje. Pohimi nuk ishte marrë si i besueshëm, përkundër raportimeve për prani të grupeve radikale islamike në Kosovë.