Eklipsi i diellit u eklipsua nga mjegulla!

Edhe në disa nga majat e maleve me lartësi mbi 2000 metra, eklipsi i diellit nuk ka mundur të shihet qartë

Eklipsi i pjesshëm i diellit, ose zënia e tij, që ishte paralajmëruar për mëngjesin e ditës së sotme, ka mundur të shihet vetëm pjesërisht dhe në vendet me lartësi më të madhe. Pamjen e qartë të eklipsit në pjesën më të madhe të Zvicrës e kanë penguar retë dhe mjegulla e dendur që ka karakterizuar ditën e sotme.

Megjithatë, edhe në disa nga majat e maleve në Zvicrën Qendrore me lartësi mbidetare më shumë se  2000 metra, eklipsi i diellit nuk ka mundur të shihet qartë, njoftojnë mediet zvicerane.

Turistë të shumtë dhe kureshtarë të tjerë ua kishin mësyrë me kamera kodrave dhe maleve për të shikuar spektaklin e rrallë të natyrës, por shumica e tyre ishin ndarë të zhgënjyer me atë që (nuk) kishin parë.