Integrimi

Ervin Sheu, apel shqiptarëve me shtetësi zvicerane të votojnë më 30 prill

Sheu apelon te shqiptarët me të drejtë vote dhe të tjerët me prejardhje të huaj të votojnë për të, në mënyrë që të kenë zërin e tyre në parlament, ku do të përcillen shqetësimet dhe interesat e tyre

Në listën socialiste prej 15 kandidatëve të PS-së së regjionit Jura Nord Vaudoise për Parlamentin e Kantonit të Vaudit, Ervin Sheu është i vetmi shqiptar. Në legjislaturën aktuale të këtij parlamenti, nga zona ku konkurron Ervini janë katër socialistë, tre prej tyre nuk kandidojnë sërish. Një shans i mirë për shqiptarin me prejardhje nga Korça për t`u zgjedhur, mund të thuhej.

Por kush është Ervin Sheu, cila është rruga politike dhe profesionale që ka ndjekur ai deri tash, cilat janë synimet e tij në politikë? Albinfo.ch ka zhvilluar një bisedë me të në prag të zgjedhjeve për parlamentin kantonal të Vaudit që mbahen më 30 prill.

“Kam lindur në Korçë në vitin 1973. Pasi që në Shqipëri kam mbaruar gjimnazin, kam ardhur në Zvicër në vitin 1997. Këtu filluar studimet në Fakultetin Juridik në Neuchatel. Gjuhën frënge e kisha të njohur para se të vija në Zvicër. Por pasi që nuk më njihej gjimnazi shqiptar, këtu kam mbaruar shkollën e mesme tregtare në Chaux de Fonds. Po ashtu kam mbaruar dy vjet të Fakultetit Juridik në Neuchatel. Më pas kam mbaruar edhe formacionin për kontabilist, profesion ky të cilin dhe e ushtroj”, prezanton veten Sheu.

“Sigurisht edhe fillimet e mia këtu nuk ishin të lehta. Si një i huaj, për shembull, e kisha të vështirë të fitoja bursë për të bërë studimet dhe kështu mu desh t`i ndërprisja ato”.

Prej dhjetë vitesh ai është përfaqësues shqiptar dhe anëtar i Komisionit për Integrim”. Dhjetë vite ka jetuar në Kantonin Neuchatel, prej nga në vitin 2007 është shpërngulur në Kantonin Vaud, gjegjësisht në qytetin Yverdon.

Nga viti i kaluar, këshilltar në Asamblenë Komunale të Yverdonit

Si një njeri i ardhur nga Ballkani, nga Shqipëria, interesimin për politikë e ka pasur të natyrshëm, siç thotë se e ka të natyrshëm edhe përcaktimin për Partinë Socialiste (PS) të Zvicrës. “Kjo parti angazhohet më tepër për të drejtat e të huajve, i mbështet ata prandaj si njeri me prejardhje të huaj kam bërë zgjedhjen e natyrshme. Për nga orientimi jam socialdemokrat”, thotë Sheu për albinfo.ch.

Në zgjedhjet e vitit 2016 për Asamblenë komunale ka fituar një vend si këshilltar komune, ndërkohë që pasaportën zvicerane e kishte marrë vetëm një vit më parë, tregon Sheu. Ai sqaron më tutje se në kantonin ku jeton ai, e drejta e votës në nivele komunal u garantohet edhe të huajve me leje qëndrimi të përhershëm.

Ervini është anëtar i kryesisë së PS në nivel kantoni ndërsa bën pjesë edhe në kryesinë e seksionit për migrantë të kësaj partie në nivel të Zvicrës. “Prej dhjetë vitesh jam përfaqësues shqiptar dhe anëtar i Komisionit për Integrim”, tregon ai.

Kur jemi te komuniteti shqiptar i këtushëm, duhet theksuar se Ervin Sheu është prej vitesh kryetar i LAPSH “Naim Frashëri” për regjionin ku jeton, Jura Nord Vaudoise.

Shqiptarët me shtetësi zvicerane të shfrytëzojnë më shumë të drejtën e votës

I pyetur se përse një votues me prejardhje shqiptare duhet t`ia japë votën atij, Sheu së pari ndalet në shpjegimin e rëndësisë që ka për të huajt dhe në këtë kontekst edhe për ata me prejardhje shqiptare, shfrytëzimi të drejtës së votimit.

“Nga ajo që shihet, mund të thuhet se në Zvicër po vështirësohet natyralizimi, pajisja e të huajve me pasaportë zvicerane. Kur e them këtë e kam parasysh faktin se  përfaqësuesit e UDC/SVP-së po janë më aktivë me politikën e tyre. Për këtë arsye po bëhet shumë i rëndësishëm shfrytëzimi i të drejtës se votës për qytetarët me prejardhje të huaj. Duke votuar, ua pamundësojmë të tjerëve të vendosin në emrin tonë dhe e kundërshtojmë pohimin e tyre se të huajt nuk janë të interesuar të marrin pjesë në jetën e këtushme politike”, thotë Ervin Sheu për albinfo.ch.

Po ashtu ai dëshiron të angazhohet për të drejtën e votës për të huajt në rrafshin kantonal, duke qenë se ajo për komuna tashmë është arritur. Bashkëbiseduesi ynë vë re se shumë pak nga shqiptarët e shfrytëzojnë të drejtën e votës në nivelet që e kanë. Ndërsa e brengos fakti se ka edhe të tillë që votojnë për partitë që njihen si jo shumë miqësore ndaj të huajve.

Ai apelon te shqiptarët me të drejtë vote dhe të tjerët me prejardhje të huaj të votojnë për të, në mënyrë që të kenë zërin e tyre në parlament, ku do të përcillen shqetësimet dhe interesat e tyre. Sheu është i vetëdijshëm për numrin e kufizuar të shqiptarëve me të drejtë vote dhe sigurisht që pret edhe vota nga të tjerët. Statistika të sakta nuk mund të ketë por ai beson se megjithatë është një numër i konsiderueshëm nga komuniteti ynë që kanë pasaportën zvicerane dhe votimi sa më masiv nga ana e tyre mund të bëjë diferencën.

Të zyrtarizohet Mësimi Plotësues në gjuhën shqipe dhe në gjuhët e komuniteteve tjera të huaja

Ndër premtimet elektorale Ervini ka angazhimin që “kurset e gjuhëve dhe kulturave të origjinës”, siç është emërtimi zyrtar i mësimit plotësues në gjuhët e komuniteteve të huaja të zyrtarizohet, të njihet nga sistemi arsimor në kanton”. Këtu ai ka parasysh në radhë të parë mësimin plotësues në gjuhën shqipe, gjegjësisht LAPSH-in ku është aktiv prej vitesh. “Duke e njohur mirë gjuhën amtare, fëmijët janë më të gatshëm të mësojnë gjuhën e vendit”, thotë ai duke iu referuar studimeve shkencore që kanë arritur në këtë konstatim. Ndërsa synimet tjera për të cilat ai do të angazhohet në rast se zgjidhet deputet janë hapja e më shumë kopshteve për fëmijë, çmimet më të volitshme në transportin publik si dhe avancimi i nivelit të shkollës që të jetë i arritshëm për të gjithë.

Ervin Sheu është i martuar me një grua nga Shqipëria, ka dy vajza dhe pret së shpejti edhe një vajzë të tretë. Bashkëshortja e tij punon në sferën sociale.


 Biografi e shkurtë:

  • Emri e mbiemriErvin  Sheu
  • Prejardhja:Shqipëri
  • Vendi ku vepron:Zvicër
  • Profesioni:Këshilltar në Asamblenë Komunale të Yverdonit