Është paguar më pak se kolegu, 27.000 franga kompensim për gruan!

Gruaja është paguar për 6 për qind më pak se kolegu i saj ndërsa instituti nuk ka mundur të sqarojë këtë dallim

Instituti kërkimor për bujqësi në baza biologjike (Fibl) në Frick (Aargau) duhet t`i paguajë një punëtores së tij 27 mijë franga kompensim për diskriminimin e pësuar, transmeton albinfo.ch mediat zvicerane. Ajo është paguar më dobët se kolegu i saj për të njëjtën punë dhe me kualifikim të njëjtë.

Duke vendosur për zhdëmtimin e saj, Gjykata Federale e Zvicrës ka vërtetuar vendimin që më parë e kishte shpallur Gjykata e Lartë e Kantonit Aargau.

Gruaja e punësuar në institutin e përmendur është paguar për 6 për qind më pak se kolegu i saj ndërsa instituti nuk ka mundur të sqarojë në mënyrë objektive këtë dallim.

Shuma prej 27 mijë frangash është llogaritur për të kompensuar diskriminimin që ka ndodhur për pesë vite me radhë.