Pranohet zbarkimi i 49 emigrantëve

Foto ilustrim

Pas gati tri javësh në det të hapur në kërkim të një porti të sigurt për t’u zbarkuar, ka gjetur sot zgjidhje çështja e 49 emigrantëve në bordin e anijes humanitare gjermane Sea Watch 3.

Në bashkëpunim me autoritetet europiane, qeveria malteze ka pranuar zbarkimin e 49 emigrantëve, të cilët më pas do të shpërndahen në 8 shtete europiane: Gjermani, Itali, Rumani, Francë, Portugali, Irlandë, Holandë e Luksemburg.

Transportimi i emigrantëve në tokën malteze do të nisë menjëherë, e do të kryhet nga forcat e Ushtrisë së Maltës.

Menjëherë pas këtij operacioni, qeveria malteze kërkon që anije humanitare Sea Watch 3 të largohet nga ujërat territoriale të Maltës.

Sipas mediave, përcjell oranews.tv, 49 emigrantët e anijes Sea Watch u shpëtuan në ujërat e Mesdheut natën e 22 dhjetorit – mes tyre janë 4 gra e 3 fëmijë të mitur, përcjell albinfo.ch.

Në gjetjen e zgjidhjes së zbarkimit të tyre në tokë apeloi edhe Ati i Shenjtë, Papa Francesku, i cili u kërkoi liderëve europianë një solidaritet konkret, e jo vetëm fjalë ndaj 49 emigrantëve që prej disa javësh enden në Mesdhe, në kushte klimatike e higjienike ekstreme.