EULEX: Autopsia në rasti Dehari ishte profesionale

EULEX-i beson se hetimet dhe autopsia në Deharin, është kryer në mënyrë të saktë, profesionale dhe me kujdes, në pajtim me praktikat më të mira evropiane dhe duke i hetuar të gjitha pistat e mundshme

Misioni i Bashkimit Evropian për Sundimi të Ligjit në Kosovë (EULEX) e konsideron të saktë dhe profesionale autopsinë që kanë bërë mjekoligjorët kosovarë në rastin e Astrit Deharit, aktivitetit i Lëvizjes Vetëvendosje, që u gjet i vrarë në burgun e Prizrenit. Sipas EULEX-it, autopsia është profesionale, por ka hapësirë për përmirësim të sistemit korrektues kosovare.

“EULEX-i e monitoroi këtë rast dhe beson se hetimet dhe autopsia janë kryer në mënyrë të saktë, profesionale dhe me kujdes, në pajtim me praktikat më të mira evropiane dhe duke i hetuar të gjitha pistat e mundshme”, thuhet në një komunikatë të lëshuar nga EULEX.

Ndonëse rrethanat janë të jashtëzakonshme, institucionet e Kosovës, sipas EULEX-it,  kanë zbuluar se Astriti ka qenë i vetëm në qeli në kohën kur ka ndodhur rasti.

“Këtë e konfirmojnë incizimet e kamerave të sigurisë dhe dëshmitë e personave të pranishëm. EULEX-i i mbështetë të gjeturat dhe konstatimin logjik të nxjerrë prej fakteve dhe provave të gjetura gjatë hetimeve dhe autopsisë”, thuhet në komunikata.

EULEX-i vlerëson se gjithçka që lidhet me vdekjen e Astrit Deharit duhet të shërbejë për të rikujtuar se megjithëse Shërbimi Korrektues i Kosovës është duke u përpjekur që të bëjë përmirësime dhe se duhet të bëhet edhe më shumë në të ardhmen për t’i parandaluar incidentet si ky dhe humbje të jetëve tjera.

Në anën tjetër, sot në Kuvend është zhvilluar një debat i ashpër ndërmjet deputetëve të Vetëvendosje dhe ligjvënësve të koalicionit. Vetëvendosje po kërkon seancë të veçantë parlamentare për t’u diskutuar rreth vrasjes apo vetëvrasjes së Astrit Deharit, por kjo nuk po mbështet nga mazhoranca.