EULEX nis hetimet për masakrën e Krushës

Prokuroria i ka identifikuar 56 të pandehur të mundshëm të cilët do të përballen me akuza për krime lufte

Trembëdhjetë vjet pas përfundimit të luftës, duket se një prokurori ndërkombëtar i ka rënë në mend që të hetojë njërën nga masakrat më të tmerrshme të luftës në Kosovë (1998-1999), atë të Krushës së Vogël, ku nga forcat serbe të Millosheviqit u vranë 113 burra.

Bazuar në një kumtesë lëshuar nga Misioni i BE-së për Sundim të Ligjit (EULEX), është një prokuror ndërkombëtar nga Prokuroria e Qarkut në Prizren, i cili ka filluar zyrtarisht hetimet për krime të luftës të kryera në fshatin Krushë e Vogël më 25 dhe 26 mars 1999.

“Deri tani, Prokuroria i ka identifikuar 56 të pandehur të mundshëm të cilët do të përballen me akuza për krime lufte kundër popullatës civile, duke përfshirë vrasjen e gjithsej 113 fshatarëve, dëbimin e të gjitha grave dhe fëmijëve nga fshati, plaçkitjen dhe shkatërrimin e pronës”, thuhet në një komunikatë lëshuar nga EULEX-i.

Masakra në Krushë të Vogël pretendohet të jetë një nga vrasjet më masive që ka ndodhur gjatë konfliktit të vitit 1999 në Kosovë.