Ferati kritikon shefat dhe fiton suspendimin nga klubi!

Beg Ferati është aktivizuar njëherë për U23 të Freiburgut, ndërsa të gjitha ndeshjet e bundesligës i ka shikuar nga tribunat

Beg Ferati, futbollisti i cili disa muaj më parë pati lënë FC Baselin për të kaluar në FC Freiburg të bundesligës gjermane, ka rrezik të mbetet pa klub. Fajin për këtë duket ta ketë ai vetë, pasi që futbollisti i repartit të mbrojtjes, ka dhënë disa deklarata publike me ton kritik ndaj udhëheqjes së klubit.

Ai nuk është aktivizuar në asnjë ndeshje të këtij sezoni dhe për këtë arsye ka drejtuar kritika përmes gazetës “Basler Zeitung” ndaj shefave të tij. Për pasojë, Ferati 26 vjeçar është suspenduar dhe, për një kohë të pacaktuar nuk do të ketë të drejtë as të marrë pjesë në stërvitjet e klubit.

Siç shkruajnë ndërkohë mediet zvicerane, Ferati edhe asshtu nuk kishte ndonjë ardhmëri në Freiburg. Trajneri Streich, në disa takime që kanë pasur bashkë ia ka bërë me dije se nuk ka shanse për të luajtur në këtë skuadër.

Gjatë sezonit aktual, Beg Ferati është aktivizuar njëherë për juniorët U23 të Freiburgut, ndërsa të gjitha ndeshjet e bundesligës të skuadrës së tij i ka shikuar nga tribunat. Megjithatë, kontrata me Freiburgun atij i kalon vetëm në vitin 2014.