FH: Kosova, Shqipëria, Maqedonia, pjesërisht të lira

Në raportin e fundit të organizatës “Freedom House”, thuhet se Kosova, Shqipëria, Maqedonia e Bosnja, kanë mbetur në mesin e shteteve “pjesërisht të lira”

Freedom House, një organizatë tjetër ndërkombëtare e ka radhitur sërish Kosovën dhe Shqipërinë në mesin e vendeve pjesërisht të lira për vitin 2015. Në të njëjtën kategori janë edhe vendet e rajonit si Maqedonia, Mali i Zi dhe Bosnja e Hercegovina, ndërsa Serbia vitin e kaluar ka bërë progres duke u përfshirë në mesin e vendeve të lira.

Kosova sa u përket të drejtave politike ka marrë notën 3 nga 4 sa ishte një vit më parë, ndërsa për liritë civile, vlerësimi është i pandryshuar në 4. Në raportin e publikuar të mërkurën, Kosova, Bosnja dhe Maqedonia përmenden si vende që janë përballur me qeverisje jofunksionale.

“Në Kosovë, deputetët kanë kundërshtuar njërën nga marrëveshjet për normalizimin e marrëdhënieve me Serbinë dhe kanë penguar në vazhdimësi debatin parlamentar duke hedhur gaz lotsjellës brenda parlamentit dhe duke qëlluar me vezë zyrtarët qeveritarë”, thuhet në raport e FD, raporton VOA.

Sa i përket krizës politike, FH përmend përplasjet pozitë-opozitë pas nënshkrimit të dy marrëveshjeve me Serbinë për krijimin e Asociacionit të komunave me shumicë serbe dhe asaj për shënimin e vijës kufitare me Malin e Zi.

Shqipëria ka të njëjtën shkallë vlerësimi, duke marrë 3 pikë për gjendjen e lirisë në përgjithësi, në një sistem matës me një shkallë nga 1 në 7, ku 1-shi përfaqëson liritë më të mëdha dhe 7-ta mungesën më të madhe të lirive.

Në raport thuhet ndërkaq se qeveria e Bosnjës e Hercegovinës vazhdon të jetë e ngathët për t’u përballur me problemet përfshirë edhe korrupsionin endemik që ka përfshirë atë vend. Ajo madje mund të përballet me situatë edhe më të vështirë, nëse ndodhë referendumi i planifikuar nga serbët e Bosnjës mbi legjitimitetin e gjykatave kombëtare.

Në Maqedoni, thuhet në raport, partia në pushtet është përfshirë pos tjerash në një skandal përgjimesh masive, duke krijuar kështu një hendekpolitik me opozitën dhe duke nxitur ndërhyrjen e Bashkimit Evropian për mbajtjen e zgjedhjeve të parakohshme në vitin 2016.

Freedom House thekson se viti i kaluar ishte i dhjeti me radhë gjatë të cilit është shënuar rënie e lirive në shkallë botërore, duke përmendur sulmet terroriste që kanë ndodhur gjatë vitit 2015. Në raport përfshihet kriza e refugjatëve sirianë dhe paaftësi të Evropës për t’u përballur me ta.

Në raport janë përfshirë 195 vende, nga të cilat 86 janë radhitur si të lira, 59 si pjesërisht të lira dhe 50 si jo të lira. Ndryshe, matësi i lirive nga FH është nga shkalla 1 deri në 7, ku 1-shi përfaqëson liritë më të mëdha dhe 7-ta mungesën më të madhe të lirive.