Fillon shkolla verore “Ta njohim atdheun”

Filloi shkolla verore “Ta njohim atdheun”, në të cilën do të marrin pjesë më shumë se 40 nxënës nga diaspora, si nga Zvicra, Gjermania, Austria dhe Franca

Ky aktivitet ka filluar nga Biblioteka Kombëtare dhe Universitare e Kosovës në Prishtinë, të cilës paraprakisht nxënësit nga diaspora i bënë një vizitë.

Shkolla verore “Ta njohim atdheun” është bërë tradicionale dhe mbahet çdo vit me nxënës nga diaspora, në kuadër të manifestimit tradicional “Ditët e Diasporës në Kosovë 2013”.

Qëllimi i kryesor i kësaj shkolle, e cila do të zgjatë deri më 14 korrik, është bashkimi i fëmijëve nga diaspora, mësimi i gjuhës shqipe, komunikimi dhe shkëmbimi i njohurive mes fëmijëve të diasporës dhe atyre nga Kosova.

Në shkollë do të organizohet mësimi nga gjuha dhe letërsia shqipe, historia, gjeografia, arti muzikor dhe arti figurativ, si dhe aktivitete rinore dhe kulturore, thuhet në njoftimin të MeD-it