Integrimi

Florim Cuculi flet për sëmundjet kardiovaskulare te gratë në Forbes Women’s Summit 2025

E diel, 26 Tetor 2025 - 13:18 albinfo.ch

Në kuadër të Forbes Women’s Summit 2025, prof. Florim Cuculi, drejtues i Departamentit të Kardiologjisë në Luzerner Kantonsspital, mbajti një fjalë rasti mbi sëmundjet kardiovaskulare te gratë dhe mënyrën se si ato ndryshojnë nga ato tek burrat.

Cuculi theksoi se gratë shpesh shfaqin simptoma atipike, të cilat në shumë raste neglizhohen ose keqinterpretohen. Ai vuri në dukje se dallimet në edukimin mjekësor dhe në strukturën arteriale mund të çojnë në diagnostikim të pasaktë dhe trajtime të papërshtatshme.

Sipas tij, inteligjenca artificiale dhe analiza e të dhënave të mëdha (big data) mund të ndihmojnë në kuptimin më të mirë të dallimeve gjinore dhe në përmirësimin e kujdesit ndaj pacientëve.

“Shëndeti është pasuria jonë më e çmuar. Simptomat nuk duhet kurrë të injorohen, pasi mund të kenë pasoja serioze për jetën,” – ishte mesazhi i tij kryesor.

Ekipi i Forbes Switzerland falënderoi të gjithë pjesëmarrësit e samitit, duke theksuar se diversiteti në biznes mbetet një temë qendrore, edhe përballë sfidave të kohës.

Ngjarja u mundësua nga partnerët: L’Oréal, Lamborghini, Merz Aesthetics, smzh ag, EY, The Boardroom, Wenger Plattner, Tamedia dhe Park Hyatt Zurich.