FSHF ndërpret bashkëpunimin me trajnerin Panucci

Federata Shqiptare e Futbollit ka ndërprerë bashkëpunimin me trajnerin Christian Panucci.

Vendimi është marrë pas përfundimit të sfidës së djeshme në “Loro Boriçi”, ndaj Turqisë, ku kuqezinjtë u mposhtën me rezultatin 0-2.

Rezultatet e dobëta, që shoqëruan kuqezinjtë gjatë gjithë vitit 2018, por edhe në këtë fillim të edicionit eliminator të Euro 2020, kanë ndikuar në këtë vendim.

Në njoftimin zyrtar të FSHF-së, thuhet se për ndeshjen me Andorrën, që do të zhvillohet të hënën, skuadra do të drejtohet nga Ervin Bulku dhe Sulejman Mema, shkruan tch, përcjell albinfo.ch

Kujtojmë që Bulku ka qenë asistent i Panuccit, ndërsa Mema është afruar për të ndihmuar ish mesfushorin me eksperiencën e tij, për sfidën me Andorrën.

Christian Panucci mori drejtimin e kuqezinjve në verën e 2017-ës, ku zëvendësoi Gianni De Biasin, ndërsa debutoi me ndeshjet kundër Lichtensteinit dhe Maqedonisë.