Gjermani: Rritet numri i pikave mbushëse të automjeteve elektrike

@pixabay

Numri i stacioneve të rikarikimit për makinat elektrike në Gjermani u rrit me 35% vitin e kaluar, duke tejkaluar shkallën e rritjes së nevojshme për të mbajtur të njëjtin hap me përhapjen e makinave elektrike me bateri në vend, deklaroi të martën shoqata e sektorit të energjisë, BDEW.

Në tetor të vitit të kaluar, qeveria gjermane miratoi një plan që parashikon shpenzime 6.3 miliardë euro në tre vjet, për të rritur me shpejtësi numrin e stacioneve të rikarikimit, si pjesë e strategjisë drejt emetimeve neto zero nga transportet.

BDEW, e cila përfaqëson kompanitë e shërbimeve, deklaroi, në bazë të llogaritjeve të saj, se rritja e infrastrukturave të instaluara të rikarikimit, e ofruar si nga sektori publik, edhe nga kompanitë private, tejkaloi me 20% shifrën e nevojshme për të mbajtur të njëjtin hap me rritjen e makinave elektrike të regjistruara deri më tani.

Nga totali i ri prej 80.541, numri i stacioneve të rikarikimit ultra të shpejtë (HPC) me fuqi më të madhe se 150 kilowatt, i cili siguron autonomi për një distancë prej 100 kilometrash (62 milje) në pak minuta, është rritur me 83% krahasuar me një vit më parë, duke arritur në 7.037 stacione.

Ndërkohë, numri i stacioneve të rikarikimit të shpejtë që përdorin energji elektrike me rrymë direkte (direct current – DC) mes 22 dhe 149 kW është rritur me 15%, duke arritur në 6.216 njësi.

Në kategorinë e tretë, numri i stacioneve të rikarikimit normal, mes 11 dhe 22 kW me rrymë të alternuar (alternating current – AC) për përdorim privat dhe gjysmëpublik, u rrit me 34% në 67.288 njësi, sipas të dhënave.

Në fund të vitit 2022, kompanitë siguruan 2,47 gigavat (GW) fuqi të instaluar për makinat elektrike krahasuar me 1.74 GW një vit më parë.

Të dhënat e qeverisë në tetor të vitit të kaluar tregonin 1.5 milionë makina tërësisht elektrike në përdorim, një e dhjeta e objektivit të qeverisë për vitin 2030.

Kerstin Andreae, drejtore e përgjithshme e BDEW, deklaroi në një konferencë për shtyp se shoqata llogariti se ritmi aktual i rritjes do të prodhonte vetëm 8 milionë automjete krahasuar me objektivin e qeverisë prej 15 milionë makinash në vitin 2030.

Masat që mund të ndihmojnë në arritjen e qëllimit përfshijnë më shumë bonuse për blerësit e makinave elektrike, duke nxitur punëdhënësit të ofrojnë rikarikim në vendin e punës dhe përshpejtimin e lejeve të nevojshme – tha Kerstin Andreae/  Reuters