Lajme

Zvicër: 100 franga gjobë atyre që kalojnë kufirin për të bërë shoping

Me këtë, nuk sanksionohet blerja në vetvete, por pengimi i punës së autoritetit të mbrojtjes së kufijve

Në mes të marsit, Këshilli Federal pati vendosur ndalim të hyrjes gjegjësisht kalimit të kufijve ndërshtetërorë për të frenuar pandeminë e koronavirusit, shkruan srf.ch.

Por një vendim i tillë nuk mundi të ndalonte “turizmin e shopingut”, gjegjësisht mësymjen e banorëve të Zvicrës për të blerë matanë kufirit, ku çmimet e të gjithë artikujve janë më të ulëta.

Administrata Federale e Doganave ka konstatuar në javët e fundit se gjithnjë më shumë zviceranë po bëjnë blerje matanë kufijve.

Tani, me një ndryshim të rregullores, do t`u shqiptohen gjoba njerëzve të padëgjueshëm.

Qytetarët zviceranë ose personat me leje qëndrimi mund të hyjnë në Zvicër në çdo kohë, transmeton albinfo.ch. Por, nëse ata dalin jashtë vendit për të bërë blerje, do të dënohen me gjobë prej 100 frangash.

Në një komunikatë të publikuar të enjten Këshilli Federal sqaron se me këtë nuk do të sanksionojë blerjen në vetvete, përcjell albinfo.ch. Përkundrazi, ai do të sanksionojë pengimin e punës së autoritetit të mbrojtjes së kufijve.

Sidoqoftë, zbatimi i vendimit të mesit të marsit po funksionon “në pjesën më të madhe mirë”, thuhet në një komunikatë të Këshillit Federal.