Lajme

“Gjuha Shqipe dhe Trashëgimia”, ishte temë e diskutimit në “Diaspora Flet”

“Gjuha Shqipe dhe Trashëgimia”, ishte tema e diskutimit në ditën e tretë të konferencës “Diaspora Flet”, moderuar nga gazetarja Rudina Xhunga.

Roli i gjuhës shqipe në mirëmbajtjen e identitetit kulturor dhe etnik të shqiptarëve në diasporë, sfidat që përballet tashmë mësimdhënia në diasporë dhe roli i diasporës, shoqatave kulturore dhe katedrave të albanologjisë, si dhe të institucioneve shtetërore për ruajtjen dhe përhapjen e gjuhës shqipe, ishin çështjet që u shtruan për diskutim.

Të ftuar ishin znj. Mimoza Hysa, drejtuese e Qendrës së Botimeve për Diasporën, z. Gazmend Kapllani, drejtor i Katedrës së Albanologjisë “Hidai Eddie Bregu” në Universitetin DePaul në Çikago dhe anëtar i Këshillit Koordinues të Diasporës, dhe Muhamet Idrizi, mësimdhënës në diasporë dhe themelues e kryesues i “Oda e Hamburg e.V”.

Znj. Hysa, duke vënë theksin në rëndësinë e nismave institucionale në mbështetje të gjuhës shqipe, paraqiti vizionin e Qendrës së Botimeve për Diasporën, e cila mbi të gjitha po mbështet shkollat shqipe përmes dërgimit të teksteve shkollore në të katër anët e botës dhe përmes programit të dygjuhësisë që përfshin hartimin e teksteve në dy gjuhë, me qëllim afrimin e brezit të ri, të dytë a të tretë të rritur jashtë vendit me gjuhën amtare.

“…Fëmijët tanë në diasporë, domosdoshmërisht duhet të mësojnë me të njëjtat programe, të njëjtat tekste.

Në politikat për mbështetjen e gjuhës shqipe janë ndërmarrë hapa të rëndësishëm, si hartimi i regjistrit të mësuesve të gjuhës shqipe në Diasporë, me qëllim evidentimin dhe mbështetjen e tyre. Ashtu siç është marrë vendimi dhe për ngritjen e qendrave të përbashkëta kulturore Shqipëri – Kosovë në Diasporë, si vatra të përhapjes së gjuhës shqipe dhe kulturës shqiptare nëpër botë. …Gjuha shqipe është nga çështjet kryesore që na bën bashkë. Është një kryeçështje”, tha ndër të tjera ajo.


LAJME INTERESANTE NGA INTERNETI