Kriza në Ukrainë

Gjykata e Hagës po heton krimet e luftës në Ukrainë

Gjykata Ndërkombëtare Penale (ICC) ka dërguar ekipin e saj “më të madh” të ekspertëve në Ukrainë për të hetuar krimet e dyshuara të luftës që nga pushtimi rus në shkurt.

Kjo sipas kryeprokurorit të Gjykatës me bazë në Hagë, Karim Khan.

Ekipi do të përmirësojë mbledhjen e dëshmive të dëshmitarëve, identifikimin e materialeve mjeko-ligjore dhe do të ndihmojë për të siguruar që “provat të mblidhen në një mënyrë që forcon pranueshmërinë e tyre në procedurat e ardhshme”, transmeton Ap, përcjell Albinfo.ch.

Khan falënderoi Holandën, ku ndodhet gjykata, për dërgimin e një “numri të konsiderueshëm ekspertësh kombëtarë holandezë” për të ndihmuar misionin.

Ekspertët duhet të intervistojnë dëshmitarët, të sigurojnë dhe analizojnë provat dhe të mbështesin hetuesit kombëtarë në sigurimin e provave.

Përveç kësaj, ekipi do të punojë gjithashtu së bashku me ekspertët francezë të mjekësisë ligjore që janë tashmë në Ukrainë. Sipas prokurorisë, puna e të gjithë personave të përfshirë në zonën e konfliktit duhet të koordinohet në mënyrë efektive.