Lajme
Gjykohet kosovarja: Ka tentuar të mbysë burrin, me helm dhe me kabllo
Gjykata e Qarkut e Cyrihut e pati dënuar me tetë vjet e gjysmë burg për tentativë vrasjeje. Ajo po ashtu pati vendosur për dëbim shtatëvjeçar të gruas nga Zvicra
Nga e hëna, një grua që akuzohet se ka tentuar të helmojë burrin e saj dhe ta mbysë atë me një kabllo po përgjigjet para Gjykatës së Lartë (kantonale) të kantonit të Cyrihut, transmeton albinfo.ch. Në të njëjtën kohë, po gjykohet edhe burri i saj pasi, sipas gruas, ai e ka dhunuar atë në vazhdimësi.
Në procesin e zhvilluar në nëntor të vitit 2020, Gjykata e Qarkut të Cyrihut nuk kishte asnjë dyshim për fajësinë e 54-vjeçares nga Kosova.
Në një mbrëmje prilli të vitit 2018, ajo kishte përzier në pijen e burrit medikamente për të helmuar atë, shkruan sda.ch. Kur kishte parë të nesërmen se ai ende jetonte, ajo i kishte lidhur një kabllo për mbushje telefonash rreth qafës për ta mbytur, transmeton albinfo.ch. Por burri i kishte mbijetuar edhe asaj.
Sipas gjykatës, ajo nuk ka vepruar në vetëmbrojtje, siç kishte pretenduar. Përkundrazi, ajo ishte xheloze, sepse burri në Kosovë kishte një dashnore shumë më të re. Përveç kësaj, ajo ka dashur të sigurojë edhe pasurinë e familjes, të cilën e ka parë në rrezik për shkak të lidhjes së re të dashurisë të burrit të saj.
Gjykata e Qarkut e Cyrihut e pati dënuar me tetë vjet e gjysmë burgim për tentativë vrasjeje. Ajo po ashtu pati vendosur për dëbim shtatëvjeçar të gruas nga Zvicra. Ky dënim ishte shumë më i lehtë në krahasim me pretendimin e prokurorisë.
Shfajësim për bashkëshortin
Ndërkaq, Gjykata e Qarkut e kishte shpallur të pafajshëm bashkëshortin 49-vjeçar, po ashtu nga Kosova. Gjykata nuk ka përjashtuar që gruaja të ketë qenë viktimë e bashkëshortit të saj. Megjithatë, provat nuk ishin të mjaftueshme për ta dënuar, përcjell albinfo.ch. Prandaj gjykata kishte ndjekur parimin “në rast dyshimi, për të akuzuarin”. Por, kosovari, nga ana tjetër, ka marrë gjobë me kusht për një vepër tjetër penale, për mashtrim të sigurimeve sociale.
Prokurori kishte kërkuar 16 vjet burgim për gruan për tentativë vrasje. Për burrin ai kishte kërkuar katër vjet burgim për përdhunim dhe sulm seksual. Po ashtu prokurori ka kërkuar që gruaja të dëbohet nga vendi për 15 vjet dhe burri për 10 vjet. Nga ana tjetër, avokatët kanë kërkuar lirim për të dytë.
Të ngjashme
Të tjera nga Lajme
E-Diaspora
-
Blick: Shaqiri dëshmon sërish pse Zvicra nuk mundet pa të Gazeta zvicerane shkruan se nëse ka pasur dyshime që Përfaqësuesja e Zvicrës në futboll nuk bën...
-
BQK: Dërgesat e mërgatës deri në fund të muajit shkurt 2024 arritën në mbi 174 milionë euro
-
52-vjeçari nga Kosova gjen vdekjen në vendin e tij në punës në Itali
-
Shkolla shqipe në SHBA, me qindra nxënës shqiptarë
-
Mbahet takimi i Kolegjit të kirurgëve të Kësovës me kirurgët nga mërgata
Jeta në Zvicër
-
Iniciativat zvicerane synojnë t’i japin fund diskriminimit të çifteve të martuara Partia qendrore e Zvicrës ka dorëzuar nënshkrimet për dy nisma që synojnë "arritjen e drejtësisë për...
-
Ortekët kanë mbytur 14 persona në Zvicër këtë dimër
-
Drejtori i Përgjithshëm i UBS-së, Sergio Ermotti, fitoi 14.4 milionë franga vitin e kaluar
-
Zvicër: Delegacioni i financave kritikon krijimin e sekretariateve të reja shtetërore
-
Cyrihu kërkon të ndryshojë tarifat për procesin e nënshtetësisë zvicerane