Gratë në pension në moshën 65 vjeçare?

Qeveria e ka angazhuar ministrin Berset për të punuar në reformimin e fushës së pensionimit, me çka gratë do të barazohen me burrat

Ministri i çështjeve sociale në Këshillin Federal të Zvicrës Alain Berset ka ndërmend të thyejë një tabu: të zgjasë moshën e pensionimit të femrave nga 64 sa është tash në 65 vjet.

Për këtë ai në mbledhjen e sotme ua ka komunikuar idenë kolegëve të tij ministra.

Qeveria e ka angazhuar sot ministrin Berset për të punuar në realizimin e revizionit në çështjen e pensionimit, ku hyn ngritja  e moshës së pensionimit për gratë në 65 vjet. Kështu, gratë do të barazohen me burrat sa i takon moshës së pensionimit.

Reforma më tutje do të bëjë që shtylla e parë dhe e dytë (sigurimi pensional dhe ai profesional) të harmonizohen mes vete. Pensionet, me reformën e pritshme nuk do të ulen. Në të ardhmen, mosha më e re në të cilën mund të kërkohet pensioni do të jetë mosha 58 vjeçare. Por do të ketë stimulime që kjo moshë të shtyhet deri në 65 e më shumë vjet, njofton sda.

Realisht, sot meshkujt shkojnë në pension në moshën 64.1 vjeçare ndërsa femrat.

Zgjatja e moshës për pensionim bëhet për shkak se mosha mesatare e zviceranëve është duke u zgjatur dhe me këtë, ata jetojnë edhe shumë vite pas pensionimit. Në këtë mënyrë, paguesit e kontributeve nuk kanë mundësi ta mbushin në mënyrë të mjaftueshme fondin e pensioneve.

Në verën e vitit të ardhshëm ministri Berset do t`i prezantojë qeverisë dokumentin me parallogaritjet e sakta lidhur me këtë propozim. Një propozim konkret do t`i kalohet parlamentit për miratim në fund të vitit 2013.

Kjo do të ishte puna më e madhe me të cilën do të profilizohej ministri më i ri në Qeverinë e Zvicrës, vlerësojnë mediet zvicerane.