Kuriozitete

Gratë, të interesuara për shkollim e punësim sa burrat

Instituti GAP sot ka publikuar raportin statistikor për vitin 2019

Punësimi dhe përfaqësimi i grave në Kosovë – raport statistikor i vitit 2019

Instituti GAP sot ka publikuar raportin statistikor për vitin 2019 “Punësimi dhe përfaqësimi i grave në Kosovë” dhe raporti paraqet në mënyrë statistikore pozitën e gruas në punësim, arsim dhe mirëqënie sociale.

Statistikat për vitin 2019 tregojnë se në Kosovë vajzat dhe gratë janë të interesuara për shkollim dhe punësim po aq sa djemtë dhe burrat.

Megjithatë, siç theksoi GAP përmes një komunikate, shkalla e punësimit të tyre, sidomos në pozita të larta udhëheqëse, mbetet shumë e ulët në krahasim me burrat“.

Këto dallime janë më të shprehura sidomos në nivelin qendror. Deri në ditën e dorëheqjes së Kryeministrit Haradinaj, vetëm 10% e posteve të larta drejtuese (ministra, zv.ministra, sekretarë të përgjithshëm) menaxhoheshin nga gratë.

Edhe në pozitat drejtuese në administratën komunale përfaqësimi i grave mbetet mjaft i ulët, me vetëm 20%.”, theksoi instituti në komunikatë.

Përveç në pozita drejtuese, në përgjithësi, sipas GAP-it, shkalla e grave të punësuara mbetet më e ulët se e burrave.

Përderisa shkalla e papunësisë tek burrat, më 2019, ishte 22.8% apo 6.3 pp më e ulët se në vitin 2018, shkalla e papunësisë tek gratë ishte 32.7% apo 2.1 pp më e lartë se në vitin 2018.

“Pra, përderisa papunësia te burrat ka shënuar rënie, te gratë ka ndodhur e kundërta. E në anën tjetër, interesimi i grave për të gjetur një vend pune është gati i të njëjtit nivel me atë të burrave.

Numri i burrave punëkërkues të regjistruar në Agjencinë e punësimit, në vitin 2019 ishte 52,343, kurse numri i grave punëkërkuese të regjistruara në Agjencinë e punësimit ishte 43,547.”, theksoi GAP në komunikatë.

Mbi 6,700 punëkërkuese gra i kishin të përfunduara studimet Bachelor, që është numër më i lartë se sa numri i burrave punëkërkues me të njëjtin profil. Raportin mund ta gjeni duke klikuar këtu.