Gül: Zvicra, shembull për Turqinë

Gül ka lavdëruar edhe rolin konstruktiv të shtetit zviceran për dialogun në mes të Turqisë dhe Armenisë

Në fjalimin e mbajtur dje në Parlamentin Nacional, të Zvicrës, presidenti turk Abdullah Gül ka lavdëruar vendin mikpritës si një vend shembull për Turqinë. Ai me këtë rast, siç raporton gazeta “20 Minuten” ka prekur pikat që lidhin historinë e dy vendeve nga periudha e themelimit të shtetit modern turk.

Në Lozanë, në vitin 1923 ishte vënë baza juridike për themelimin e Republikës Turke që do ta trashëgonte perandorinë otomane. Ndërkaq Gül ka lavdëruar edhe rolin konstruktiv që po luan shteti zviceran për nxitjen e dialogut në mes të Turqisë dhe Armenisë. Po ashtu Zvicra shërben si shembull për fuqinë e shtetit juridik dhe për forcimin e pozitës së gruas, ka thënë Gül më tutje.

Presidenti turk është ndalur më shumë në potencialin për thellimin e marrëdhënieve ekonomike në mes të dy vendeve. Pasditen e sotme Gül viziton Cyrihun ku pritet të takohet me një delegacion prej 20 ekonomistësh dhe afaristësh zviceranë për të biseduar rreth mundësive të bashkëpunimit ekonomik në mes të dy shteteve.