Halbah: Nuk ka asgjë shqetësuese në Platformën shqiptare

I dërguari special i ministrisë së Jashtme të Gjermanisë për Evropën Juglindore dhe Turqinë, Kristian Helbah është shprehur i bindur se presidenti Gjorgje Ivanov duhet t’i jep mandatin shumicës parlamentare, që me këtë t’i hap rrugë formimit të qeverisë së re

Platforma shqiptare nuk paraqet asgjë shqetësuese për Maqedoninë, ka deklaruar i dërguari special i ministrisë së Jashtme të Gjermanisë për Evropën Juglindore dhe Turqinë, Kristian Helbah. Këto komente ai i bëri pas takimit që realizoi me liderët e partive politike shqiptare. Ai madje është shprehur i bindur se presidenti Gjorgje Ivanov duhet t’i jep mandatin shumicës parlamentare, që me këtë t’i hap rrugë formimit të qeverisë së re.

“Jemi të bindur se Ivanov duhet t’i lejoj shumicës parlamentare që sa më shpejtë në Kuvend të formoj qeverinë e re. Është shumë e rëndësishme që Specialja të vazhdoj me punën e saj në bashkëpunim me institucionet tjera. Partitë politike të kenë kujdes dhe mos të përdorin gjuhën e urrejtjes, tensionet duhet të ulen”, deklaroi diplomati gjerman, Helbah.

Ndërkaq, Ali Ahmeti i kundërshtoi pohimet mediale se ai është tërhequr nga Platforma e përbashkët shqiptare. “Diskutuam me për situatën politike, gjermania është e interesuar për sigurinë dhe stabilitetin e Maqedonisë”, ka thënë Ahmeti, citon INA.

Kurse Ziadin Sela pas takimit me të dërguarin e posaçëm gjerman, ka deklaruar se partitë politike shqiptare janë të vendosur dhe se  nuk heqin dorë nga Platforma e përbashkët dhe se sipas tij presidenti Ivanov me mosdhënien e mandatit vetëm se thellon edhe më tepër krizën politike.

Në këtë takim, Sela i informoi për situatën politike të krijuar në Maqedoni dhe mundësinë e tejkalimit të këtij momenti politik si dhe krijimin sa më të shpejtë të Qeverisë Reformiste.

Temë diskutimi ishte edhe platforma e subjekteve politike shqiptare, si element i rëndësishëm edhe për perspektiven integruese të Maqedonisë e cila pritet të jetë pjesë e programit të ardhshëm qeveritar që do të reflektonte edhe kërkesat reale te votuesve shqiptar që votuan subjektet e tyre politike.

“Shteti gjerman edhe njëherë dëshmon se është i interesuar për stabilitetin dhe sigurinë e Maqedonisë, deklaroi lideri i lëvizjes BESA|, Billal Kasami, pasi përfundoi takimin me ambasadorin Helbah. Kasami u shpreh se është optimist dhe pret që kriza disa vjeçare politike shumë shpejtë të mbarojë dhe kërkoi sjellje te matur prej aktoreve politik.