Hapet shkolla shqipe në Heppenheim të Gjermanisë

Një hap i rëndësishëm për ruajtjen e gjuhës dhe identitetit shqiptar në mërgatë

Në qytetin Heppenheim (Bergstraße), në landin e Hessenit, është hapur zyrtarisht shkolla në gjuhën shqipe, një nismë me rëndësi të veçantë për ruajtjen dhe kultivimin e gjuhës, kulturës dhe identitetit kombëtar shqiptar në mërgatë. Mësimin në këtë shkollë do ta ndjekin mbi 20 nxënës shqiptarë nga ky rajon, transmeton albinfo.ch.

Hapja e shkollës u shënua me një ceremoni solemne, ku mori pjesë Konsulli i Përgjithshëm i Republikës së Kosovës në Frankfurt, zGëzim Gashi. Të pranishëm ishin gjithashtu prindërit e nxënësve, mësuesja Alma Selimi Zyberi, veprimtari dhe publicisti Argjend Hasani, si dhe përfaqësues të komunitetit shqiptar.

Në fjalën e tij, Konsulli i Përgjithshëm Gëzim Gashi falënderoi Lidhjen e Arsimtarëve dhe Prindërve Shqiptarë në Hessen (LAPSH Hessen) për angazhimin dhe sukseset e arritura në institucionalizimin e mësimit të gjuhës shqipe. Ai theksoi se falë këtij organizimi, sot rreth 400 nxënës ndjekin mësimin shqip në landin e Hessenit, duke u mbuluar pothuajse i gjithë territori, nga Kassel në veri e deri në Heppenheim në jug.

Atmosfera në ditën e hapjes ishte e mbushur me entuziazëm dhe emocione, veçanërisht tek nxënësit, klasa e të cilëve gumëzhinte nga gëzimi. Ambienti ishte i stolisur me flamurin kombëtar shqiptar dhe flamurin shtetëror të Kosovës, ndërsa prindërit shprehën kënaqësinë e tyre që, pas një angazhimi të madh dhe bashkëpunimi të suksesshëm, shkolla shqipe u bë realitet. Në këtë proces u veçua edhe kontributi i Gani Lajçi, në bashkëpunim të ngushtë me mësuesen Alma Selimi Zyberi, transmeton tutje albinfo.ch.

Në fjalën e saj përshëndetëse, mësuesja Alma Selimi Zyberi uroi mirëseardhjen nxënësve, prindërve dhe mysafirëve, duke theksuar emocionin e rikthimit të saj në profesion pas nëntë vitesh ndërprerjeje. Ajo falënderoi prindërit, Lidhjen e Arsimtarëve Shqiptarë në Gjermani, Konsullin Gëzim Gashi dhe drejtuesit e Gjimnazit “Starkenburg” në Heppenheim për mbështetjen e dhënë në hapjen e kësaj shkolle.

Me këtë rast, Konsulli Gashi dhe shkrimtari Argjend Hasani përshëndetën të pranishmit, duke vënë në pah rëndësinë e shkollave shqipe në mërgatë për edukimin dhe identitetin kombëtar të brezave të rinj.

Në përmbyllje të aktivitetit, mësuesja Alma Selimi Zyberi, së bashku me Konsullin Gashi, shpërndanë librat mësimorë për nxënësit, të cilët janë dhuratë nga Ministria e Arsimit e Republikës së Shqipërisë dhe Ministria e Arsimit e Republikës së Kosovës për fëmijët shqiptarë në diasporë.

Organizatorët ftojnë prindërit shqiptarë të këtij rajoni që të regjistrojnë fëmijët e tyre në shkollën shqipe dhe të kontribuojnë në ruajtjen dhe forcimin e gjuhës shqipe ndër brezat e rinj./Albinfo.ch

Adresa e shkollës shqipe:

Starkenburg Gymnasium

Gerhart-Hauptmann-Straße 21

64646 Heppenheim, Gjermani

---